د اوکراین ولسمشر ولادیمیر زیلینسکي د شنبې په ورځ فبروري ۱۵ (سلواغې ۲۷) د یو متحد اروپايي پوځي ځواک جوړیدو غوښتنه وکړه او ټینګار یې وکړ چې "نوي واقعیت" ته په پاملرنې د روسیې د دوامداره ګواښونو په وړاندې او د متحده ایالاتو د ملاتړ په اړه د ډاډ د نشتوالي له امله د اروپا لویه وچه باید په خپل ځان بسیا شي.
ولسمشر زیلینسکي د المان د مونشن په امنیتي کنفرانس کې وویل: "موږ باید د اروپا وسلهوال ځواکونه جوړ کړو، ترڅو د اروپا راتلونکې یواځې پر اروپایانو متکي وي او د اروپا په اړه تصمیم په اروپا کې ونیول شي. "
زیلینسکي دا څرګندونې په داسې حال کې کړي چې کیف د روسیې د یرغل د پای ته رسولو په هڅو کې د څنډې ته کېدو او د مسکو په ګټه د یوې معاملې کېدو په اړه اندېښمن دی. زیلینسکي ټینګار کړی چې اوکراین او اروپا باید په هر ډول مذاکراتو کې ګډون ولري.
هغه زیاته کړه: "اوکراین به هېڅ کله هغه معاملې چې زموږ تر شا او زموږ له ګډون پرته کېږي و نه مني. همدا اصل باید د ټولې اروپا لپاره هم صدق وکړي. له اوکراین پرته د اوکراین په اړه هېڅ تصمیم، له اروپا پرته د اروپا په اړه هېڅ تصمیم ( و نه نیول شي). "
د اوکراین ولسمشر همداشان وویل: "موږ باید د اروپا په نوم عمل وکړو نه د جلا خلکو په توګه. "
زیلینسکي چې پر اوکراین باندې د روسیې د یرغل د درېیم تلین په درشل کې د مونیخ په امنیتي کنفرانس کې وینا کوله ټینګار وکړ چې په ناټو کې د خپل هېواد له غړیتوب څخه نه تېرېږي او کیف به د ریښتیني امنیتي ضمانتونو پرته د اوربند توافق ونه مني.
هغه وویل: "که په ناټو کې غړیتوب ممکن نه وي نو باید په اوکراین کې د یو بل ناټو د جوړېدو لپاره شرایط برابر شي. "
زیلینسکي همداشان د اروپا لپاره د متحده ایالاتو ژمنتیا تر پوښتنې لاندې راوستله او ویې ویل: "ایا امریکا، اروپا ته اړتیا لري؟ د یو مارکېټ په توګه، هو، د یو متحد په توګه، نه پوهېږم. "
زیلینسکي دا څرګندونې د متحده ایالاتو د ولسمشر د مرستیال ديجی ونس په ګډون د امریکا له لوړ پوړو چارواکو سره له لیدنې وروسته کړې دي. ونس د مونیخ په کنفرانس کې د خپلو څرګندونو پر مهال په اوکراین کې د دوامدارې سولې پر اړتیا ټینګار وکړ.
زیلینسکي ونس ته په خطاب وویل چې اوکراین له روسیې سره د درې کلنې جګړې د پای ته رسولو لپاره د هر ډول مذاکراتو له پیلېدو څخه وړاندې له واشنګټن څخه "امنیتي ضمانتونه" غواړي.
له دې وړاندې د متحده ایالاتو د دفاع وزیر پیټ هګست د ناټو غړو هېوادونو د دفاع وزیرانو ته ویلي و په دې اړه تمې به له به واقعیتونو لرې وي چې د اوکراین پولې دې بېرته د ۲۰۱۴ کال څخه وړاندې حالت ته وګرځي او ټینګار یې وکړ چې سپینه ماڼې په ناټو کې د اوکراین غړیتوب د دې ستونزې د حل لار نه ګڼي.
کیف غواړي چې روسیه د اوکراین له نیول شویو ځمکو څخه ووځي او د مسکو د بیا برید کولو د مخنیوي لپاره په ناټو کې د غړیتوب او یا د هغې په برابر د امنیتي ضمانتونو د رامنځ ته کېدو پر سر ټینګار کوي.
هګست د جمعې په ورځ فبروري ۱۴ په وارسا کې د خپلې وینا پر مهال خبرداری ورکړ چې په ناټو کې د متحده ایالاتو اروپايي ملګري باید له ځان څخه د دفاع او د اوکراین د راتلونکي په اړه د سولې د تضمین په برخه کې لا زیات اقدامات ترسره کړي.
هګست دغه راز وویل چې له روسیې سره د مذاکراتو لپاره د روسیې پر ولسمشر ولادیمیر پوټین باندې "باور ته اړتیا"نشته.
له دې دوه ورځې وړاندې د متحده ایالاتو ولسمشر ډونالډ ترمپ له پوټین سره پر ټیلیفون باندې د اوږدو او رغنده خبرو د ترسره کېدو خبر ورکړ او ویې ویل د دواړو خواو د ډلو ترمنځ ژر د مذاکراتو د ترسره کېدو پر سر توافق شوی دی.
زیلینسکي د ټرمپ د دغو څرګندونو په غبرګون کې وویل چې اوکراین به د خپل ګډون پرته هېڅ توافق ونه مني.
فورم \ دبحث خونه