په داسې حال کې چې افغان حکومت د افغانستان د خپلواکۍ سلمې کلیزې د لمانځلو لپاره پراخ تدابیر نیولي د ازادۍ د اتل غازي امان الله خان مترقي افکار او اهداف لا هم د خلکو په ذهنونو کې دي او د هغه وخت د یادګارونو د لیدو لپاره ملي موزیم ته ځي.
د افغانستان ملي موزیم د هیواد لومړنی موزیم دی چې د غازي امان الله خان په وخت کې جوړ شوی دی.
د خپلواکۍ له ګټلو سل کاله وروسته په ملي موزیم کې په زرګونو تاریخي اثار نندارې ته ايښودل شوي.
پدې موزیم کې د غازي امان الله خان د وخت موټرونه هم شته چې د هغه وخت د ترقي او پرمختګ نښانې څرګندوي.
د افغانستان ملي موزیم د لومړي ځل لپاره په ۱۲۹۷ هجري لمریز کال کې د کابل په باغ بالا کې جوړ شو.
په لومړیو کې په دې موزیم کې چې "عجایب خانه" یا د عجایبو کور نومیده یوازي څو ډوله تاریخي آثار لکه خطي قران شریفونه، لاسي صنایع ، د استقلال د جګړو پاتې شوي آثار او یو شمیر کمیابه کتابونه ساتل کیدل.
خو د افغانستان ملي موزیم د ۱۳۰۳ هجري لمریز کال د لړم میاشتي په پنځه ویشتمه نیټه له باغ بالا څخه ارګ ته انتقال او په رسمي ډول د شاه امان الله خان له خوا افتتاح شو.
