افغان امنیتي مقامات وايي چې په کندهار ښار کې يې د وسله والو طالبانو بریدونه دفعه کړي.
نن چهارشنبه سهار وسله والو طالبانو د کندهار ښار پر دریمې، شپږمې، پنځلسمې او پنځمې حوزې ډله ییز بریدونه پيل کړه چې ورسره سم د کندهار ښار په یو بشپړ جګړیز حالت کې دی.
د ۲۰۵ اتل قوال اوردو ویاند جګړن محمد صادق عیسی امریکاغږ ته وويل چې ګډو افغان ځواکونو د وسله والو طالبانو بریدونه دفعه کړي او ژر به په ښار کې د پلټنې عملیات پيل کړي.
نوموړي وويل: "نن سهار وختي په لوړ شمېر کې وسله والو طالبانو د ښار په بیلا بیلو حوزو کې بریدونه پيل کړي چې ډېر فشار يې د کندهار پر عمومي زندان و زموږ ګډو قواوو پر وسله والو بریدونه کړي زندان یې ساتلی، خو جګړه شته او موږ هڅه کوو چې هر څه ژر عادي شي تر اوسه د هوايي قواوو په یوه برید کې ۱۵ وسله وال وژل شوي."
کندهار ښار په بشپړه ډول تړل شوی او ښار یو جګړیز حالت ته تللی.
د کندهار ښار سل ګونه کورنۍ د امن ځای په لټه کې د ښار نسبتاً امن څنډو ته ځانونه رسوي.
د کندهار امنيې قوماندانۍ په یوه اعلامیه کې ويلي چې پولیس د ښار په ګڼو برخو کې په پلټنیزو عملیاتو بوخت دي او د نن سهار راهیسې هیڅ یوې حوزې سقوط ندی کړی.
د میرویس حوزوي وروغتون رئیس ډاکتر محمد داود فرهاد امریکا غږ ته وويل چې له تیري شپې راهیسې ۶۸ تنه ټپیان روغتون ته ور وړل شوي چې ۸ پکښې ښځینه او ۹ هم ماشومان دي.
نوموړي په جګړه کې له ښکېلو غاړو څخه وغوښتل چې روغتیايي تاسیسات دي له ګواښ څخه لېري وساتي.
ډاکتر فرهاد زیاته کړه: "همدا اوس په میرویس روغتون کې لس ګونه ټپیان تر درملنې لاندې دي زموږ خدمات یوازي جګړې د قربانیانو لپاره دي هیله مو داده چې روغتیايي تاسیساتو ته څوک زیان ونه رسوي."
دا مهال جګړه د میرویس روغتون سره په نږدې فاصله کې روانه ده چې په یو کیلو متر واټن کې یې د کندهار عمومي زندان موقعیت لري.
وسله والو طالبانو رسنیو ته په لیږلي بیان کي ويلي چې د کندهار ښار په دریمه، شپږمه او پنځمه حوزه کې يې بریدونه دوام لري.
