ټاکل شوې چې زلمی خلیلزاد به د چهارشنبې په ورځ (مۍ۲۲) د بندو دروازو تر شا د متحدو ایالتونو د کانګرس د بهرنیو اړیکو کميټې ته له طالبانو سره د روانو مذاکراتو په اړه پټ معلومات ورکړي.
زلمی خلیلزاد د افغانستان د بیا پخلاینې او سولې په چارو کې د امریکا ځانګړی استازی دی. د دغې دندې له پیل راهیسې به دا لومړی ځل وي چې ښاغلی خلیلزاد امریکايي قانون جوړوونکو ته د افغانستان د سولې د روان بهیر په اړه راپور ورکوي.
تر دې مخکې د امریکا د کانګرس ځینو غړو د متحدو ایالتونو د بهرنیو چارو له وزیر مایک پمپیو څخه غوښتي وو چې ښاغلی خلیلزاد دې ور واستوي چې له طالبانو سره د سولې د روانو خبرو په اړه هغوی ته راپور ورکړي.
تېره میاشت د کانګرس د بهرنیو اړیکو د کمېټې دموکرات غړو مایک پمپیو ته په استول شوي لیک کې ویلي وو چې له طالبانو سره د سولې په خبرو کې "شفافیت" نشته.
زلمي خلیلزاد تر دې دمه په قطر کې له طالب استازو سره شپږ ځلې لیدلي دي، دواړه خواوې په دغو مذاکراتو کې د پرمختګونو خبره کوي.
افغان حکومت او د افغانستان د سولې عالي شورا هم پر ښاغلي خلیلزاد نیوکه کړې وه چې له طالبانو سره د خپلو تماسونو په اړه افغان حکومت ته معلومات نه ورکوي.
