د متحده ایالاتو یو ځانګړي استازي د چهارشنبې په ورځ مارچ ۱۳ (کب ۲۳) له پاناما څخه وغوښتل چې ایراني کښتیو ته اجازه ورنکړي چې د دوی تر بیرغ لاندې فعالیت وکړي.
دغه کار ایران ته ددې امکان برابروي چې د واشنګټن له خوا د لګول شويو اقتصادي بندیزونو څخه ځان وژغوري.
د مرکزي امریکا کوچنی هیواد پاناما د هغو هېوادنو په سر کې راځي چې د نورو هېوادونو شرکتونو ته اجازه ورکوي چې خپلې بیړۍ د دوی تر بیرغ لاندې وچلوي.
یو شمېر شرکتونه د لوړو فیسونو او نظارت څخه د خلاصون په خاطر خپلې بیړۍ په نورو هېوادونو کې راجستر کوي.
د ایران لپاره د متحده ایالاتو ځانګړي استازي مرستیال ابرام پیلي وویل: "ایران او د ایران همکاران هڅه کوي چې د پاناما له لارې له بندیزونو ځان وژغوري. دوی هڅه کوي چې د پاناما تر بیرغ لاندې د بیړیو ثبتولو څخه ناوړه ګټه پورته کړي."
پیلي ددې دپاره پاناما ته سفر کړی "څو ډاډ ترلاسه کړي چې زموږ له بندیزونو څخه د خلاصون دپاره شرکتونه په پاناما کې د خپلو بیړیو له راجستر کولو څخه ناوړه ګټه نه پورته کوي."
د پاناما د سمندري ادارې په وینا، په دغه هېواد کې ۸۵۴۰ بیړۍ تبث شوي چې د نړۍ د ټولو بیړیو شاوخوا ۱۶ سلنه جوړوي.
واشنګټن شک لري چې ځینې دغه بیړۍ د ایران دي او هڅه کوي چې د امریکا له بندیزونو څخه په پټه تیل ولیږدوي.
ایران په ۲۰۱۸ کال کې له یوې مهمې اتومي موافقې څخه د واشنګټن له وتلو راهیسې د امریکا تر سختو بندیزونو لاندې دی.
د پیلي په وینا، لږ تر لږه شپږ کښتیو چې د پاناما بیرغ ورباندې و، د جنوري راهیسې له دې بندیزونو سرغړونه کړې ده.
د پاناما د بهرنیو چارو مرستیال وزیر ولادیمیر فرانکو په ایکس ټولنیزه شبکه کې په خپل یو بیان کې وویل چې له پیلي سره یې د دواړو هیوادونو ترمنځ د "سمندري همکارۍ" پراخولو په اړه خبرې کړي دي.
د امریکا حکومت پر ایران تور لګوي چې د تیلو له پلور څخه په ترلاسه شوي عاید باندې د یمن د حوثي یاغیانو، حزب الله او حماس په څېر سازمانونو مالي ملاتړ کوي.
ماهرین وايي، ځینې شرکتونه چې د نورو هېوادونو تر بیرغ لاندې خپلې کښتۍ ثبتوي، د چاپیریال مقرراتو او د کار قوانینو ته هم پاملرنه نه کوي او هڅه کوي چې د کښتۍ د اصلي مالک هویت پټ کړي.
پیلي وویل: "موږ تمه لرو چې د پاناما حکومت به د خپلو کورنیو قوانینو او نړیوالو مکلفیتونو پراساس زموږ سره کار ته دوام ورکړي."
فورم \ دبحث خونه