د متحده ایالاتو د بهرنیو چارو وزارت وایي چې د افغانستان لپاره د امریکا ځانګړي استازي تامس ویسټ، د افغان میرمنو، نجونو او بشري حقونو لپاره ځانګړې استازې رینا امیري او په قطر کې د افغانستان ماموریت لپاره د متحده ایالاتو د سفارت شاردافیرې کرن ډیکر د طالبانو جګپوړو استازو او مسلکي ټکنوراتانو سره د دوو ورځو لپاره کتلي دي.
دې وزارت په اعلامیې کې ویلي چې غونډه د روانې جولای میاشتې په ۳۰ مې او ۳۱ مې د قطر په پایتخت دوحې کې شویده او په "مهمو ګټو" پکې خبرې شویدي.
په اعلامیې کې ویل شوي چې امریکایي چارواکو پدې غونډې کې د افغان ولس د ملاتړ لپاره د اعتماد جوړولو لارې چارې په ډاګه کړلې.
د بهرنیو چارو وزارت همدرانګه ویلي چې په غونډې کې امریکایي پلاوي په افغانستان کې د بشري ناورین په هکله ژوره اندیښنه څرګنده کړه او د بشري اصولو سره سم یې د خیریه مؤسسو او ملګرو ملتونو اړوندو ادارو سره ملاتړ څرګند کړ چې افغانانو ته بشري مرستې رسوي.
د اعلامیې له مخې امریکایي چارواکو پدې غونډې کې د طالبانو څخه د هغو پالیسیو بدلولو غوښتنه وکړه چې په افغانستان کې د بشري وضعیت خرابیدو سبب شویدي، په ځانګړې توګه د میرمنو، نجونو او هغو افغانانو په برخې کې چې د خطر سره مخ دي.
امریکایي چارواکو همدانګه د طالب استازو سره په غونډې کې د نیول کیدو، د مطبوعاتو ځپلو او مذهبي مناسکو باندې د محدودیتونو وضع کیدو په هکله جدي اندیښنه څرګنده کړې.
په اعلامیې کې ویل شوي چې امریکا د افغان ولس د دې غوښتنې ملاتړ کوي چې د حقونو درناوی غواړي او دا چې هیواد په راتلونکې کې د هغوي غږ واوریدل شي.
په همدې حال کې د طالبانو د بهرنیو چارو د وزارت ویاند عبدالقهار بلخي ویلي چې پدې دوه ورځنۍ غونډې کې "د دواړو لوریو تر منځ د اعتماد جوړونې، په دغه لاره کې د عملي ګامونو اخیستلو، تورو لیستونو او بندیزونو لیري کولو، د افغانستان بانک زیرمو ازادولو، د افغانستان اقتصادي ثبات ساتلو، مخدره موادو پر خلاف د مبارزې او بشري حقونو پر موضوعاتو خبرې وشوې ."
د افغانستان د مرکزي بانک او مالیې وزارت استازو هم پدې غونډې کې د امریکایي چارواکو سره کتلي دي او د افغانستان د اقتصادي وضعیت او بانکي سکتور کې د ستونزو په هکله یې ورسره خبرې کړي.
د متحده ایالاتو د بهرنیو چارو د وزارت په اعلامیې کې راغلي چې امریکایي چارواکو پدې غونډې کې په افغانستان د شیانو د نرخونو رالویدل او په ۲۰۲۳ کال کې د صادراتو او وارداتو لپاره د اموالو ډیریدو یادونه وکړله او د اقتصادي ثبات په هکله د تخنیکي خبرو لپاره یې چمتوالی وښود.
طالبانو همدارنګه پدې غونډې کې یو ځل بیا ژمنه وکړله چې هیچا ته به اجازه ورنکړي چې د افغانستان د خاورې څخه د متحده ایالاتو او متحدینو پر ضد یې کار واخلي.
امریکایي چارواکو همدرانګه د طالبانو څخه د هر ډول قید او شرط پرته د هغو امریکایي اتباعو خوشې کیدل غوښتي چې د طالبانو سره بندیان دي او دا یادونه یې هم کړې په بند کې د دې کسانو ساتل کیدل د مثبت تعامل په مخکې یو مهم خنډ دی.
فورم \ دبحث خونه