د امریکا متحده ایالتونو د چهار شنبې په ورځ سپټمبر ۲۲ (وږې ۳۱) د نړۍ له هیوادونو سره د مرستې په خاطر د ۵۰۰ میلیونه دوزه واکسین د اخیستلو خبر ورکړ.
د امریکا جمهور رئیس جوبایډن دا مطلب د چهار شنبې په ورځ په یوې انلاین غونډه کې چې د نړۍ په سطحه د کرونا واکسین د تطبیق د کچې د لوړیدو په خاطر جوړه شوې وه، اعلان کړ.
ښاغلی بایډن وویل، د کرونا ویروس د له منځه وړلو په هدف، باید د نړۍ په ټولو نقطو کې ددې ویروس د خپریدو مخه ونیول شي.
بایډن نړۍ ته د واکسین د رسیدو په هدف د اضافه ۳۷۰ میلیونو ډالرو د ځانګړي کیدو اعلان وکړ، نوموړی همدارنګه د نړۍ په سطحه د واکسین د ویش په هدف د "واکسین د نړیوالې ټولنې" سره هم د ۳۸۰ میلیونو ډالرو د ورکړي خبر ورکړ.
بلخوا د امریکا د جمهور رئیس مرستیالې کامله هریس د چهار شنبې په ورځ، په راتلونکې کې د ساری ناروغتیو د مخنیوي په هدف په نړیوال بانک کې له یوه نوې نړیوال مالي میکانیزم سره د امریکا د ۲۵۰ میلیونو ډالرو ژمنه اعلان کړه.
په دغه نوې میکانیزم کې د ټولو لپاره د ۱۰ میلیاردو ډالرو هدف تعین شوی دی.
میرمن هریس وویل:"دې ساري ناروغۍ موږ غافل ګیره کړو چې نه باید شوي وای." هغې زیاته کړه:"موږ د نه تیاریو په قیمت پوه شوو . له هرې مړینې سره موږ د قیمت جدیت ته متوجه شوو. اوس د عمل وخت رارسیدلی دی."
بایډن په راتلونکې کال کې حد اقل د نړۍ د ۷۰ سلنه نفوس د واکسین کیدو په برخه کې د روغتیا د نړیوال سازمان هدف ومانه او له دې اعلان سره یې نور شتمن هیوادونه هم وهڅول څو د ویروس د مخنیوي لپاره خپلې هڅې ډیرې کړي.
دا په داسې حال کې ده چې په دې وروستیو کې پر واشنګټن فشارونه زیات شوي دي چې له ټولو هیوادونو سره د کرونا واکسین مرسته وکړي.
نړیوالو سازمانونو او د نړۍ یو شمیر مشرانو د واکسین د ویش پر څرنګوالي او سوکه سرعت باندې انتقاد کړی دی، په خاص ډول مخ پر ودې هیوادونو کې. هغوی انتقاد کړی چې د امریکا اقدام کافي ندی ځکه دا هیواد غواړي اوس امریکایانو ته د کرونا تقویتي دوز هم ورکړي په داسې حال کې چې په بیوزلو هیوادونو کې خلکو تر اوسه خپل لومړی دوز هم ندی اخیستی.
امریکا د خپل نوې تعهد له مخې، په مجموع کې د نړۍ له هیوادونو سره د کرونا د ۱.۱ میلیارد دوزه واکسین مرسته کوي.
روغتیایي کارپوهانو اټکل کړی چې بیوزلي هیوادونه پنځه تر شپږ میلیارده دوزه واکسین ته ضرورت لري.
د روغتیا د نړیوال سازمان مشر په جون میاشت کې ویلي وو چې دې هدف ته د رسیدو په هدف ۱۱ میلیارده ډوزه واکسین ته ضرورت دی.
