په جاپان کې چارواکي وایي افغانستان ته پوځي الوتکه نن دوشنبې استوي چې د دې هیواد اتباع او هغه افغانان چې د جاپان په سفارت یا نورو ادارو کې یې کار وسره کړی وي، وباسي.
د جاپان د کابینې ستر منشي کاتسونوبو کاتو یو خبري کنفرانس ته وویل چې ټاکل شوې د دې کسانو د ایستلو لپاره نورې پوځي الوتکې هم افغانستان ته ولیږل شي.
طالبان وایي په افغانستان کې میشتو بهرنیو ځواکونو د اګست د میاشتې د ۳۱ مې نیټې چې له مخې یې باید ټول بهرني ځواکونه د افغانستان نه ووځي، د تمدید کیدو غوښتنه نده کړې.
د امریکا جمهور رئیس جو بایډن تیره اوونۍ ویلي و چې دغه نیټه ښایي پدې خاطر وغځول شي چې امریکایي ځواکونه وکړی شي امریکایي اتباع د افغانستان نه راوباسي.
ښاغلي بایډن د یکشنبې په ورځ اګست ۲۲ (زمري ۳۱) وویل هیله لري چې د تخلیې عملیات په همدې میاشت کې پای ته ورسیږي خو یو شمیر اروپایي هیوادونو ویلي چې پدې نیټې د ټولو هغو کسانو ایستل چې باید د افغانستان نه وایستل شي، امکان نلري.
د کابل په هوایي ډګر کې د میشتو بهرنیو ځواکونو او نا معلومو وسله والو تر منځ نن دوشنبه اګست ۲۳ (وږي۱) جګړه شوې.
د فرانس پریس خبري اژانس د جرمني د یو عسکر له خولې ویلي چې په ډزو کې یو افغان وژل شوی او ۳ نور ټپي شوي.
په راپور کې ویل شوي چې جګړه سهار وختي د "افغان ګاردانو" او وسله والو تر منځ چې معلومه نده څوک به وي ، پیل شوه چې وروسته د امریکا او جرمني عکسر هم پکې راګډ شول.
په راپور کې نور جزیات ندي ورکړل شوي.
یوه دربست شوې الوتکه چې ۱۹۳ کسان پکې سپاره و، نن دوشنبې اګست ۲۳ (وږي۱) د بلجیم پایتخت بروکسل ته ورسیده.
الوتکې د پاکستان د پایتخت اسلام آباد نه پرواز کړی و او د بلجیم د اتباعو تر څنګ پکې هغه افغانان هم سپاره وه چې د بهرنیو هیوادونو د استازولیو سره یې کار کړی و.
د بلجیم د بهرنیو چارو وزارت د یکشنبې په ورځ ویلي چې د دې هیواد د تخلیې په پروګرام کې تر اوسه څه باندې ۴ سوه کسان د کابل د هوایي ډګر نه پاکستان ته وړل شویدي.
