سیمه ییز چارواکي وايي، تېره شپه په زابل ولایت کې د وسله والو طالبانو پر یوه ستر مرکز د عملیاتو په ترڅ کې ۱۰ وسله وال وژل شوي او ۱۲ تنه يې ژوندي نيول شوي دي.
افغان ځانګړو ځواکونو دغه عملیات د زابل ولایت په شاجوۍ ولسوالۍ کې کړي دي.
د شاجوۍ ولسوال وزیر محمد جوادي امریکاغږ اشنا راډیو ته وويل چې په کندهار کې مېشت د صفر ۳ ځانګړي قطعې سرتېرو د کره استخباراتي معلوماتو پر اساس یاد عملیات تر سره کړي.
نوموړی زیاته وي چې عملیات د وسله والو طالبانو پر هغه ستر مرکز شوي چې د غزني او زابل ولایتونو لپاره د وسله والو طالبانو مهم سیمه ییز مشران پکې اوسېدل.
جوادي وويل:"دا عملیات د ولسوالۍ د شوبار په سیمه کې د زکوزو او لودینو په کلیو کې شوي چې ۱۰ وسله وال پکې وژل شوي او ۱۲ تنه يې ځانګړو ځواکونو له ځان سره د پلټنو لپاره انتقال کړي، شوبار د غزني او زابل د وسله والو طالبانو مرکز وو چې د کابل – کندهار پر لویه لار به يې حکومتي کسان تر یرغمل کېدل وروسته همدې سیمه کې زنداني کول او د جګړې پلانونه به يې پکې جوړول."
بلي خواته د کندهار مطبوعاتي دفتر هم وايي چې د کندهار د صفر ۳ ځانګړي قطعې د زابل په شاجوۍ ولسوالۍ کې د نظامي عملیاتو پرمهال ۸ عرادې موټرسیکلان او د مخابرې د یوه مرکز په ګډون وسلې او مهمات هم لمنځه وړي.
شاجویۍ د زابل له نا امنه والسوالیو څخه ګڼل کېږي چې د کابل – کندهار د لويې لارې ۶۰ کېلو متره برخه ورڅخه تېره شوې.
خپله وسله والو طالبانو په دې اړه کومه تبصره نه ده کړې.
