سیمه ییز چارواکي وایي وسله والو طالبانو په هرات ولایت کې د «پاشدان بند» ۱۱ کار کوونکي تښتولي دي.
امنیتي مسؤلین وایي چې دغه کسان تیره ورځ د طالبانو لخوا ناڅرګند ځای ته انتقال شوي دي.
د پاشدان بند امنیتي مسؤل عارف اڅکزي نن دوشنبه فبروري ۱۵ (سلواغې۲۷) امریکا غږ ته وویل چې دغه کسان د پاشدان بند په فرعي کانال کې په کار بوخت وو چې طالبانو وتښتول.
هغه وویل چې په تښتول شویو کې د پاشدان بند ځینې انجینیران هم شامل دي.
د هرات والي سید عبدالوحید قتالي هم د پاشدان بند کار کوونکو تښتول کېدل تائید کړي، خو زیاته کړې ده چې د راخلاصولو لپاره هڅې روانې دي.
وسله والو طالبانو هم تائید کړې چې د یاد بند ځينې کار کوونکې د هغوی په وینا له اصولو څخه د سرغړونې په تور له ځان سره بېولي چې وروسته به یې ازاد کړي.
د پاشدان اوبو بند کا رکوونکي پر داسې مهال د طالبانو لخوا بېول کیږي چې ټاکل شوې تر درې میاشتو په دغه بند کې د چارواکو په وینا د اوبو ذخېره کول پيل شي.
د پاشدان اوبو بند جوړولو کار له نن څخه ۸ کاله مخکې په هرات ولایت کې پیل شوی دی.
د مسؤلینو په وینا پر یاد بند باندې ۱۱۷ میلیونه امریکايي ډالر لګښت راغلی چې د افغانستان حکومت د پراختیايي بودجې څخه ورکول کیږي.
د اوبو دغه بند په هرات کې له سلما اوبو بند څخه دوهم لوی بند دی چې جوړیږي.
د مسؤلینو په وینا د یاد په جوړېدو سره به ۱۳زره هکتاره ځمکه خړوبه شي.
