د کندهار امنیتي چارواکي وايي، د دغه ولایت په میوند ولسوالۍ کې د پولیسو پر امنیتي پوستو د طالبانو په بریدونو کې څلور پولیس او ۱۴ وسله وال طالبان وژل شوي دي.
دغه بریدونه تېره شپه مارچ ۲۳مه (وري څلورمه) د یادې ولسوالۍ په جوګرم او خاک چوپان سیمو کې رامنځته شوي چې د چارواکو په وینا تر نن سهار پورې دوام درلود.
د کندهار د پوليسو وياند څارمن جمال بارکزي امریکا غږ ته وویل چې پوليسو له خپلو مرکزونو څخه دفاع کړې او ګڼو وسله والو ته يې مرګ ژوبله اړولې ده.
هغه وویل: "په جګړه کې ۱۴ برید کوونکي وژل شوي او ۱۷ نور ټپیان شوي دي، دغه راز زموږ څلور پولیس هم وژل شوي او درې نور ټپيان شوي، زموږ د پولیسو د مرکزونو د سقوط مخه نیول شوې."
خو يوه امنيتي مقام د ميوند د جګړې په تړاو امریکا غږ ته وويل چې په پېښه کې ۸ پوليس وژل شوي دي.
ميوند د کندهار په جنوب کې د هلمند له شمالي ولسواليو سره په سرحد کې پرته ولسوالي ده چې اکثره وخت د جګړو راپورونه ورڅخه تر لاسه کيږي.
خپله وسله والو طالبانو په دې دړه کومه تبصره نه ده کړې.
