د خیبر پښتونخوا ایالت په مرکز پیښور ښار د قیصه خوانۍ بازار تر څنګ د شیعه مذهبو په یو جومات کې په رامنځته شوې چاودنې کې لږ تر لږ ۵۶ لمونځ کوونکي وژل شوي او لږ تر لږه ۱۹۴ تنه نور ټپیان شوي دي.
د فرانس پرس اژانس د جمعې په ورځ مارچ څلورمه (کب ۱۳) د پاکستان د پولیسو له قوله رپوټ ورکړی چې دغه چادونه د جمعې ورځې د لمانځه د ادا کولو پر وخت شوې ده.
د پیښور ښار د پولیسو مقاماتو ویلي چې تر اوسه یې ۵۶ مړي د پیښې له ځایه روغتونونونو ته انتقال کړي دي.
د پیښور ښار روغتیایي مقاماتو ویلي چې د یو شمیر ټپیانو وضعیت خطرناک دی او کیدای شي چې د مړو شمیر نور هم زیات شي.
د پاکستان د کورنیو چارو وزیر شیخ رشید احمد ویلي چې ځانمرګی برید کوونکی پر ساتونکو باندې د ډزو وروسته جومات ته داخل شوی او هغه چاودیدونکي مواد یې د لمونځ کوونکو په منځ کې چوولي چې له ځانه سره یې لیږدول.
د امریکاغږ اردو څانګې د ښاغلي رشید له قوله رپوټ ورکړی چې د پیښې ځای ته اضافي ځواکونه رسیدلي او ددغې چاودنې په اړه پلټنې پیل شوي دي.
پدې ترڅ کې د پاکستان صدراعظم عمران خان پر لمونځ کوونکو باندې په پیښور کې دغه وژونکی برید غندلی او د قربانیانو د کورنیو سره یې غمشریکي کړې ده.
د پاکستان دولتي تلویزیون ویلي چې ښاغلي خان مقاماتو ته سپارښتنه کړې چې د ټپیانو درملنې ته زیاته پاملرنه وکړي.
تر اوسه ددغې پیښې مسولیت کوم کس او یا ډلې ندی منلی.
