نن تر غرمې مخکې ۱۱:۰۰ بجې شاوخوا د کابل د پنځمې امنیتي حوزې په مربوطاتو کې د بهرنیو ځواکونو پر کاروان ځانمرګی برید وشو.
د افغانستان د کورنیو چارو وزارت وايي چې برید کوونکی له چاودېدونکو توکو ډک یو کرولا موټر کې ناست و، او د کابل ښار د پنځمې امنیتي حوزې اړوند د سیلو افشار په سیمه کې یې د بهرنیو ځواکونو کاروان ته نژدې ځان ته چاودنه ورکړه.
د دغه وزارت سرپرست ویاند نجیب دانش امریکا غږ ته وویل په دې برید کې ۵ ملکي کسان ټپیان شوي، چې پولیسو روغتون ته لېږدولي.
خو د کورنیو چارو وزارت په دې اړه چې ایا په دې برید کې بهرنیو ځواکونو ته هم مرګ ژوبله اوښتې، څه نه وايي.
د غوڅ ملاتړ په یوه بیان کې ویلي دي چې په دغه ځانمرګی برید کې د دوی ځواکونو ته د سر زیان نه دی اوښتی.
د کابل د پولیسو ویاند بصیر مجاهد امریکا غږ ته وویل، چې د پولیسو څېړنیز ټیمونه د پېښې سیمې ته رسېدلي او د دغه برید په اړه به نور جزئیات وروسته له رسنیو سره شریک کړي.
د پېښې ځای ته ورغلي سړکونه د پولیسو له خوا بند شوي دي. د افغانستان د ملي امنیت یو روزنیز مرکز، د پولیسو اکاډمي او د پولیسو ۲۰۰ بستریز روغتون هم د پېښې ځای ته نږدې موقعیت لري.
د دې برید مسئولیت وسلهوالو طالبانو په غاړه اخیستی دی او ادعایې کړې چې په دغه برید کې ۱۶ بهرنیو پوځیانو ته مرګ ژوبله اوښتې ده او درې ټانکونه ویجاړ شوي دي.