د پاکستان د کرکټ پخوانی لوبغاړی شاهد افریدي په خپل کتاب 'لوبه بدلونکی' کې لیکلي چې هغه خپلو لوڼو ته د دې اجازه نه ورکوي چې د کوره د باندې لوبې وکړي.
د پاکستان د کرکټ پخوانی کپتان او مشهور لوبغاړی شاهد افریدي په خپل کتاب کې د خپلو لوڼو په اړه لیکلې دي چې "که د ښځو د حقونو فعالانې هر څه وایي هغه به خپلو لوڼو ته د کوره د باندې او د خلکو په مخکې د لوبو اجازه ور نکړي."
د شاهد افریدي کتاب د ځینو پخوانو لوبغاړو په اړه د څرگندونو له کبله هم "لانجمن" بلل شویدی. افریدي د خپل ژوند په اړه په لیکل شوي کتاب کې ځینې داسې څرگندونې کړي چې په ټولنیزو رسنیو یې بحثونه راپارولي دي.
شاهد افریدي په خپل کتاب کې لیکي: "زما لوڼه په لوبو کې ښه دي او د هغې نه زیاتې په تعلیم کې قابلې دي. زما لوڼه په کور کې دننه هر ډول سپورټ کولی شي. کرکټ؟ نه; زما لوڼه به د خلکو په مخکې هیڅ ډول لوبې نه کوي."
شاهد افریدي وایي چې دغه فیصله یې د مذهب او کلتور په اساس کړیده. هغه لیکلې "د ځینو کلتوري او مذهبي دلایلو له کبله ما دا پریکړه کړیده چې زما څلور لوڼه به د کوره د باندې په لوبو کې برخه نه اخلي. زما میرمن هم زما سره موافقه ده."
شاهد افریدي څو ځله پخوا هم د ښځو په اړه همدغه ډول څرگندونې کړیدي. هغه د جیو ټلویژن ته په خپله یوه مرکه کې ویلي و چې د ښځو د کرکټ پلوي نه کوي او دا چې ښځې دې په کور کې پخلې کوي.
