د زابل ولایت یوې جیګپوړې امنیتي سرچینې امریکا غږ ته وویل، چې د دغه ولایت په شهرصفا ولسوالۍ کې اوه پولیس په داخلي برید کې وژل شوي دي.
دغې سرچینې د نوم نه ښودلو په شرط زیاته کړه، چې نفوذي پولیس له وسلهوالو طالبانو سره یو ځای شوی او د پوستې ټولې وسلې او نظامي تجهیزات یې هم د طالبانو په مرسته له ځان سره وړي دي.
د زابل د والي ویاند ګل اسلام سیال امریکا غږ ته وويل چې پېښه تېره شپه د زابل ولایت په شهرصفا ولسوالۍ کې د ملي پوليسو په یوه امنیتي پوسته کې رامنځ ته شوې ده.
هغه زیاته کړه، چې په دې اړه به بشپړ جزئیات وروسته له رسنیو سره شریک کړي.
شهرصفا ولسوالۍ د کلات په ختیځ کې له کندهار ولایت سره په سرحد کې پرته ده، چې تر ډیره د زابل له امنو ولسوالیو څخه بلل کیږي.
د امنيتی قواوو په لیکو کې داخلي بریدونه لاهم یوه جدي ستونزه بلل کیږي.
د زابل تر څنګ په کندهار، هلمند او د جنوبي ولایتونو په ځینو نورو برخو کې هم ورته پېښي رامنځ ته شوي خو امنیټي مسئولین يې په اړه وايې چې د جدي څارنې له کبله اوس دا کچه د تېر په پرتله را کمه شوې ده.
تر اوسه خپله وسله والو طالبانو د زابل د نفوذي برید په اړه کومه تبصره نده کړې.
