په غزني کې محلي چارواکو منلې چې نن شنبه سهار د قره باغ ولسوالۍ د شیراباد او نیخته د سیمو اووه یرغمل شوي اوسیدونکي د اختطاف چیانو له منګولو ازاد شوي دي.
د غزني د والي ویاند عارف نوري له امریکا غږ اشنا راډیو سره په خبرو کې وویل چې د نیخته د سیمې پنځه تنه اوسېدونکي شپږ میاشتې وړاندې د وسله والو مخالفینو له خوا یرغمل شوي او د ناوې په ولسوالۍ کې ساتل کیدل.
ښاغلي نوري وویل" دا پنځه یرغمل شوي د نیخته د سیمې اوسېدونکي وو شپږ میاشتې مخکې تښتول شوي وو، له وسله والو مخالفینو سره ساتل کیدل، دوه نور د شیراباد د سیمې اوسېدونکي وو چې دوه اوونۍ مخکې یرغمل شوي وو، دوی ټول نن خپلو کورنیو ته په شیراباد او نیخته کې وسپارل شول".
د غزني محلي چارواکي وايي، چې دا وګړي د قومي متنفذینو، د ریاست جمهوري د لیږل شوي پلاوي او ددې ولایت د محلي چارواکو په هڅو او مرستو خوشې شوي دي.
دوه اوونۍ وړاندې د غیرې مسؤلو وسله والو په برید کې د شیراباد د کلي د یوه کور دوه تنه ووژل او دوه نور یرغمل کړل شول.
د شیراباد د کلي یوه اوسېدونکي طارق بویا امریکا غږ اشنا راډيو ته وویل" د معترضینو غوښتنو ته ځواب ویل شوی، د شیراباد د کلي دوه تښتول شوي اوسېدونکي خوشې شوي دي".
له یوه کال راهیسې د قرباغ ولسوالۍ د دوو کلیو نیخته او شیراباد اوسېدونکو د اوبو په سر په خپلو کې سره په لانجه کې دي.
د غزني محلي چارواکي وايي، چې دا معضله به ژر اواره شي.
په غزني کې ۷ تښتول شوي ملکي وګړي خوشې شوي
