د افغانستان ولسمشر محمداشرف غني د څرخي پله له زندانیانو سره د لیدنې پر مهال له هغوی سره ژمنه کړې، چې د ټولو دوسیې به له سره وڅیړل شي.
ښاغلي غني د چهارشنبې په ورځ (وږي ۲۱) د څرخي پله له بندیانو سره لیدنه وکړه او په زندان کې یې د یو شمیر نویو ودانیو د جوړولو د بنسټ ډبره کیښوده.
ارګ په یو بیان کې ویلي، چې د زندانیانو دوسیې د عدالت د تطبیق لپاره له سره څیړل کیږي.
افغان ولسمشر په داسې حال کې د زندانیانو د دوسیو پر بیا څیړنې ټینګار کړی، چې د جمعې په ورځ د څرخي پله د زندان ۷۴ بندیان، له تروریستي او جنایاتکارو ډلو سره د اړیکې درلودلو په تور، د بګرام زندان ته انتقال شول.
د حکومت دغه اقدام د یو شمیر نورو زندانیانو د راپاریدو لامل شو، خو د امنیتي ځواکونو له منځګړیتوب وروسته، د زندان وضعیت بیرته عادي حالت ته وګرځید.
په بیانه کې دغه راز راغلي، چې ولسمشر غني، نن سهار د څرخي پله زندان د ۵۰ بستریز روغتون، اداري ودانۍ او نوي بلاک د بنسټ ډبره هم کیښوده.
د ارګ د معلوماتو پر بنسټ د دغه زندان نوی بلاک د ۳۰۰۰ زندانیانو د ساتنې ظرفیت لري.
افغان حکومت په داسې حال کې د څرخي پله د زندانیانو د اوسیدو د ځای او د روغتیايي وضعیت د ښهوالي لپاره لاس په کار شوی، چې له دې وړاندې د افغانستان د بشري حقونو کمیسیون د زندانیانو لپاره د ځای د کموالي او د هغوی د معیشت په تړاو اندیښنې ښودلې وې.
دغه کمیسیون په خپل یو ریپوټ کې، چې د روان کال په غويي میاشت کې خپور شوی ویلي، که څه هم د تیرو کلونو په پرتله د زندانیانو د بشري حقونو وضعیت ښه شوی، خو لا هم د افغانستان په زندانونو کې د ځای کموالی یو له جدي ستونزو څخه دی.
د دغه کمیسیون د ریپوټ پر بنسټ، څه باندې لس زره بندیان د څرخي پله په زندان کې ساتل کیږي.
