په خیبر پښتونخوا د یوې ۱۶ کلنې جینۍ په کوڅو کې د بربنډې ګرځولو پیښې یو ځلې بیا دا بحثونه پارولي دي چې د دغې سیمې خلک به تر کومې پورې د کورنی ناموس د ښځو په بدن پورې تړي.
اتو تنو د ۱۶ کلنې جینۍ جامې وشلولې او په کوڅو کې یې وگرځوله. دغه سړو د جینۍ په ورور تور لگولی و چې د هغوی ناموس ته یې سپکاوې کړیدی ځکه چې د "جینۍ ورور د هغوی د کورنۍ د یوې جینۍ سره اړیکي" لرلې.
دا ډول پیښې یواځې په پاکستان کې نه خو په ګاونډي ملکونو افغانستان او هند کې هم کیږي. په دغو ټولنو کې ښځو ته د کورنۍ د نارینو د کړنو سزا ورکړل کیږي.
د پاکستان د ډیره اسماعیل په سیمې کې چې کله دا پیښه وشوه نو پولیس د دغې جینۍ سره دمرستی په ځاې د تورن کسانو سره مرسته شروع کړه.
د پښتونخوا سره تعلق لرونکې د ښځو او ماشومانو د حقونو فعاله او ژورنالسټه ریحام خان د دغې جینۍ کور ته ورغله او د مطبوعاتو او د رسنیو پام یې دغې پېښې ته راواړوه. د هغې د تګ نه وروسته د پښتونخوا سیاستمداران هم د پېښې د مسولینو په ضد د اقداماتو غوښتنه وکړه.
ریحام خان د امریکاغږ اشناراډیو ته وویل چې "په داسې سیمو کې چې کله دا ډول پېښې وشي نو په ضد یې غږ پورته کول ډیر ګران کار وي ځکه چې دلته د داسې پیښو د مسولینو سره د سیاستمدارانو لاس وي."
ریحام خان وویل چې هغې ته او د هغې ټیم ته حتی د مرګ ګواښونه کیږي خو دا فکر کوي چې په داسې وخت کې چپ پاتې کیدل غداري ده. هغې وویل "که زه هم د دغې یتیمې جینۍ لپاره غږ پورته نه کړم نو زه به د داسې بې وسه جینکو لپاره څنګه مثالي کردار شم."
ریحام خان وایي چې د خپلې ټولنې د جینکو او ماشومانو د حقونو لپاره به مبارزې ته دوام ورکړي. هغه وایي د پاکستان او افغانستان اکثر نارینه وایي چې "ښځه د چا مور، خور او لور ده نو ځکه یې درناوې پکار دی" ریحام وایي چې د ښځې درناوې له دې کبله نه بلکه لدې کبله ضروري دی چې هغه یوه انسانه ده.
ریحام خان وایي چې د ډيره اسماعیل خان د پيښو پشان پېښې ځکه کیږي چې "خلک ښځه د سړو مکیت او ناموس ګڼي. د هر څه نه مخکې ښځې ته د انسان يه نظر وګورئ نو ډيرې مسلې به حل شي."
