په قطر کې د فوټبال د نړیوال جام تنظیموونکو یوه کرایه کړې ستره بېړۍ د دوحې په بندر کې ددې دپاره درولې ده چې د لوبو په جریان کې ورڅخه د هوټل په توګه کار واخیستل شي.
د همدې هدف دپاره دوه نورې بیړۍ لا له وړاندې دوحې ته راوستل شوي وې.
په ژنیو کې د "ایم ایس سي" سیاحتي بیړیو ادارې د دوشنبې په ورځ، اکتوبر ۱۰ (تلې ۱۸)، دا اعلان په داسې حال کې وکړ چې نړیوال جام ته تقریبا شپږ اونۍ پاتې دي. لوبې د نومبر په ۱۹ پیلیږي او پوره یوه میاشت به دوام ولري.
په دغې بیړۍ کې د یوې شپې تېرولو کرایه د سړي په سر تقریبا ۵۰۰ ډالر ده.
د قطر چارواکي وايي، کافي هوټلونه نه لري چې د فوټبال نړیوال جام دپاره راتلونکو ټولو لوبډلو، کارکوونکو او سیلانیانو ته پکې ځای ورکړي. د همدې دپاره له سترو بېړیو څخه د هوټلونو په توګه کار اخلي او همدارنګه له سیلانیانو غوښتنه کوي چې په ګاونډیو هېوادونو کې پاتې شي او د خپلې خوښې لوبو په ورځو کې قطر ته پرواز وکړي.
د نړیوال جام دپاره قطر ته د ۱.۲ میلیون وګړو د راتلو اټکل شوی دی.
د ګرځنده هوټل دا بیړۍ ۴۰۰۰ کوټې لري، او تازه په فرانسه کې جوړه شوې ده.
ټاکل شوې ده چې د نړیوال جام په نیمايي کې چې ډیرې لوبډلې بیرته خپلو کورونو ته ستنېږي، په دغو بیړیو کې د یوې شپې کرایه ۳۲۰ ډالرو ته راټیټه شي او په وروستۍ اونۍ کې ۲۲۰ ډالر شي.
د بیړیو په مینیو کې الکولي مشروبات هم شامل دي.
قطر اسلامي هېواد دی او د الکولو استعمال تر عصري هوټلونو محدود ساتي، خو خپل دغه دریځ یې د فوټبال نړیوال فدراسیون د تجارتي همکارانو او ملاتړ کوونکو د خوشحالولو دپاره نرم کړی، چې په هغوی کې د الکولي مشروباتو تولیدوونکي شرکتونه هم شامل دي.