د کردستان د کارګرانو ګوند (پي کې کې) د شنبې په ورځ، مارچ لومړۍ (کب ۱۱) وروسته له هغې له ترکیې سره د اوربند اعلان وکړ چې د دې ګوند زنداني مشر عبدالله اوجالان له خپلې ډلې وغوښتل له څلورو لسیزو څخه زیاته وسله واله مبارزه ختمه کړي.
د اوجالان لخوا د پنجشنبې په ورځ د خپل ګوند د منحل کیدو او د وسلو د ایښودلو له غوښتنې وروسته دا د کردستان د کارګرانو ګوند لومړی غبرګون دی.
د پي کې کې ملاتړې رسنۍ اې ان اف د دې ګوند د اجرایوي کمیټې په حواله په یو راپور کې ویلي: "د سولې او دموکراتیکې ټولنې او د مشر عبدالله د غوښتنې د پلي کولو لپاره د لارې هوارولو په موخه موږ له نن څخه د اوربند اعلان کوو."
د پي کې کې اجرايي کمېټه چې د عراق په شمال کې میشته ده دغه راز ویلي: "موږ د غوښتنې له محتوا سره لکه څنګه چې ده موافق یو او وایو چې موږ به یې تعقیب او عملي کړو."
دغې کمېټې زیاته کړې ده: "زموږ هېڅ ځواکونه به وسله وال اقدام ونه کړي تر هغې چې ورباندې برید شوی نه وي."
د کردستان د کارګرانو ګوند چې له ۱۹۸۴ کال راهیسې د کردانو د یو جلا هېواد د جوړېدلو لپاره مبارزه کوي د ترکیې، متحده ایالاتو او اروپايي اتحادیې لخوا د ترهګرې ډلې په توګه پېژندل شوې ده. کردان د ترکیې د ۸۵ ملیون نفوس شاوخوا ۲۰ سلنه جوړوي.
خو دغې ډلې په دې وروستیو کې د بیلتون پر ځای د فرهنګي او ژبنۍ خپلواکۍ د حقونو غوښتنه کړې ده.
وروسته له هغې چې عبدالله اوجالان په ۱۹۹۹ کې زنداني شو، د جګړې د پای ته رسولو لپاره زیاتې هڅې وشوې او په دې موده کې له ۴۰ زرو څخه ډیر کسان ووژل شول.
اوجالان د پنجشنبې په ورځ په خپل بیان کې وویل: "ټولې ډلې باید خپلې وسلې په ځمکه کېږدي او پي کې کې باید ځان منحل کړي. "
په هغه پیغام کې چې د کرستان د ګوند پلوي سیاستوالو له اوجلان سره په زندان کې له لیدنې وروسته د هغه له قوله خپور کړی راغلي دي: "زه په ځمکه د وسلې د ایښودلو غږ کوم او د دې تاریخي اقدام مسولیت په غاړه اخلم. "
۷۵ کلن اوجالان په ۱۹۹۹ کال کې ونیول شو او وروسته له هغې چې په "خیانت" تورن شو د بند مودې د تېرولو لپاره استانبول ته نږدې د "ایمرالي"امنیتي زندان ته ولېږدول شو. اوجالان لا هم د ترکیې د کردستان د کارګرانو په ګوند کې پراخ نفوذ لري.
د دې راپور په چمتو کولو کې د فرانس پرس اژانس له خبر څخه هم معلومات اخیستل شوي دي.
فورم \ دبحث خونه