په واشنگټن ډي سي کې د سپینې ماڼۍ مخې ته په پاکستان کې د پښتون ژغورنې د تحریک سره د ملاتړ څرگندولو په هدف یوه غونډه وشوه چې پکې په سلگونو پښتنو گډون وکړ.
دغې غونډې ته ځوانان، پیغلې، ماشومان او حتی سپینږیري هم راغلي و.
منظور پښتین په واشنگټن کې دغې غونډې ته په ټیلیفون وینا وکړه. هغه د گډونوالو مننه وکړه او وی ویل چې هغه پښتانه چې په امریکا او نورو هیوادونو کې ژوند کوي، پکار ده د پښتنو لپاره غږ پورته کړي چې په نړیواله کچه واوریدل شي.
غونډې ته د پښتون ژغورنې تحریک نورو مهمو مشرانو محسن داوړ او علي وزیر هم د ټیلفون د لارې ویناوې وکړې.
منظور پښتین په خپله وینا کې د پاکستان ادارو او په خاصه پوځ ته خبردارې ورکړ چې نوره د پاکستان د ادارو بدمعاشی او پخپله خاوره ترهگرۍ نه مني.
هغه زیاته کړه "راتلونکي نسلونه به په مونږ فخر کوي چې مونږ د ظلم په مقابل کې ودریدو. دا د پښتنو سره زمونږ وعده ده چې د پښتنو کور به ابادو، د نړۍ په هرې خوا کې چې پښتون اوسیږي، د هغوي د اتحاد لپاره به کار کوو."
هغه د پاکستان د پوځ د پښتنو ضد پالیسیو ته په اشاره وویل' "په دنیا کې به نور هم ډیر ظلمونه شوي وي خو د پاکستان پوځ د ځان نه خدای جوړ کړیدی او د خلکو د مرگ او ژوند فیصلې کوي."
غونډې ته محسن داوړ په خپلې وینا کې د واشنگټن د غونډې د گډونوالو نه مننه وکړه او وی ویل چې دغه شان زمونږ ملاتړ ته دوام ورکړئ.
د یادونې وړ ده چې د یکشنبې په ورځ یعني د اپریل په اتمه نیټه د منظور پښتین په مشرۍ د پښتون ژغورنې تحریک په پیښور کې یوه غونډه وکړه چې د یوې اندازې سره سم پکې د پنځلسو زرو په پورې کسانو پکې گډون وکړ.
د واشنگټن د غونډې نه د یو څو گډونوالو نظرونه
د غونډې گډونوالو د نړیوالې ټولنې او د امریکا د حکومت نه وغوښتل چې په سیمې کې د امن او سولې لپاره باید د پښتون ژغورنې د تحریک غوښتنې ومنل شي.
امریکا غږ د ځینو گډونکونکو ویډیویي پیغامونه اخیستي چې تاسو یې دلته لیدلی شئ
سپوږمۍ وزیر کاکړ غونډې ته وینا وکړه او د پاکستان د حکومت نه یې وغوښتل چې د پښتون تحریک غوښتنې دې ومنل شي.
د وزیرستان سره تعلق لرونکی ځوان غواړي چې د امریکا حکومت د هغوي قانوني غوښتنو ته متوجه شي.
د غونډې یو گډونوال احسان نورزي وویل چې د پښتون تحریک نه ملاتړ کوي
