د هغه پاکستاني پولیس افسر چې د اکتوبر په ٢٧ د اسلام اباد نه برمته شو او د چارشنبې په ورځ یې د افغانستان سره په پولې مړی وموندل شو، زوی د خپل لار د وژنې د تحقیقاتو لپاره د نړیوال کمیسیون جوړیدو غوښتنه کړیده.
د وژل شوي پاکستاني پښتون پولیس زوی امجد طاهر د خپل پلار د جنازی په مراسمو کې راټول شوې خلکو ته په وینا کې وویل "زه د خپل ملک نه سوالونه لرم او د ځواب په هیله یم چې زما د پلار سره دا بې عدالتي ولې وشوه؟ زه غواړم زما د پلار د قتل تحقیقات یو نړیوال کمیسیون وکړي ځکه چې په دی کې دوه ملکونه ککړ دي."
د طاهر داوړ د زوی دا وینا په ټویټر شریکه شوه:
هغه زیاته کړه چې پلار یې د اسلام اباد نه لادرکه شویدی او په افغانستان کې یې مړی وموندل شو.
د پښتون تحفظ تحریک مشرانو هم د طاهر د وژنې د تحقیقاتو لپاره د نړیوال کمیسیون د جوړیدو غوښتنه کړیده،
محسن داوړ امریکاغږ ته د دې پوښتنې په ځواب کې چې ولې د یو نړیوال کمیسیون د تحقیقاتو غوښتنه کوي، وویل چې طاهر داوړ چې کله لادرکه شو نو پولیس او حکومت بیخې د هغوي د موندلو لپاره هیڅ کوښښ ونکړ. داوړ زیاته کړه، "پدی کې دوه ملکونه دي، د پاکستان تحقیقاتي ډله افغانستان ته نشي ورتلی او د افغانستان نه داسې یوه ډله پاکستان ته نشي راتللی نو ځکه یوه نړیوال تحقیقاتي کمیسیون پکار دی."
په عین وخت کې د پاکستان پوځ یو ځلې بیا په افغانستان تور ولگاوه چې د طاهر داوړ د قتل نه وروسته د افغان چارواکو رویه دا څرگندوي چې په افغانستان کې نه یواځې ترهگرې ډلې بلکه نورې وسیلې هم ککړې دي.
د پاکستان د پوځ ویاند په خپل ټویټ کې دا هم لیکلي چې د داوړ د وژنې تحقېقات روان دي.
له بلې خوا د پښتون تحریک مشر منظور پښتون او پلویانو یې د طاهر داوړ وژنه د پښتنو 'منظمه وژنه' بللی ده او د ملک په مختلفو برخو کې یې احتجاجونه پیل کړیدي.
