د هند او پاکستان ترمنځ د روان کړکیچ په لړ کې د دواړو هېوادونو چارواکي وايي چې د یو بل الوتکې یې وېشتلي او غورځولي دي.
د پاکستان صدراعظم عمران خان ویلي چې د پاکستان خاورې ته داخلې شوي دوې جنګي هندي الوتکې ویشتلي او دوه پیلوټان یې هم نیولي دي.
عمران خان نن چهارشنبه خپلو خلکو ته په وینا کې ویلي چې د نن ورځې د عملیاتو هدف يې هند ته د پاکستان زور ښکاره کول و چې پاکستان د ځواب توان لري.
نوموړي ویلي"د هندوستان د حکومت څخه پوښتنه کوم چې زموږ دواړو سره کومې وسلې دي موږ د هغې د زغم نه يُو او که جګره پېل شوه بیا به نه زما (عمران خان) او نه د مودي په لاس کې وي".
هغه زياته کړه د پلوامه د بريد وروسته يې هند ته وړانديز کړی و چې په پلټنو کې ورسره مرستې ته تيار دی او زیاته کړې ده چې بيا هند ته بلنه ورکوم چې د ترهګرۍ په اړه ورسره خبرو ته تیار دی.
خو د هند د بهرنيو چارو وزارت بیا ويلي چې پاکستانۍ الوتکو نن سهار د هند پوځي تاسيسات په نښه کړي او د دوی هوايي ځواک یې هم ځواب ویلی دی.
هندي چارواکو ویلي چې نن چهارشنبه یې د پاکستان يوه جنګي الوتکه راغورځولې او د عملیاتو پرمهال خپل یوه الوتکه هم لوېدلې ده.
پاکستاني چارواکو د پاکستانۍ الوتکې را غورځولو په اړه د هندي چارواکو ادعا رد کړې ده.
هندي چارواکو همدا رنګه د خپل یوه پیلوټ د لادرکه کېدو خبر ورکړی دی، پاکستان چارواکو تر دې مخکې ویلي و چې دوی دوې هندۍ الوتکې راغورځولې او دوه پېلوټان یې هم نیولي دي.
مخکني معلومات
د پاکستان د پوځ ویاند اصف غفور ادعا کړې چې نن سهار یې دوې هندۍ جېټ الوتکې چې د پاکستان خاورې ته داخلې شوې ویشتلي او را غوځولې دي.
جنرال اصف غفور د چهارشنبې په ورځ د فبرورۍ میاشتې پر ۲۷مه پر خپل ټوېټر لیکلي چې د یادو جېټ الوتکو څخه یوه یې د پاکستان تر ولکې لاندې جمو کشمیر او بله یې د هند تر ولکې لاندې کشمیر کې لوېدلې ده.
هغه ویلي چې پاکستاني پوځ د ویشتل شوي جېټ الوتکې یو هندی پېلوټ هم ژوندی نیولی دی او همداراز د دوو نورو پېلوټانو د پیدا کولو هڅې هم روانې دي.
نوموړي ویلي چې هندۍ الوتکې له ګډې پولې څخه په سرغړونې د پاکستان خاورې ته داخلې شوي وې.
د پاکستاني رسنیو د راپورونو لهمخې بیا نن سهار د پاکستان د هوايي ځواک درې جنګې الوتکې د هند او پاکستان له ګډې پولې څخه اوښتې او د هند تر ولکې لاندې کشمیر کې پر هندۍ الوتکو یې بریدونه کړي دي.
تر دا مهاله هندي چارواکو د پاکستان د دې ادعا په اړه تبصره نه ده کړې.
که چیري د پاکستان لخوا د هندۍ جېټ الوتکو را غورځولو ادعا ثابته شي دا به د پاکستان په خاوره کې د هند پرونۍ برید ته د پاکستان لومړنی ځواب وي.
هند تېره ورځ د پاکستان تر ولکې لاندې کشمیر په بالاکوټ سیمه د جېش محمد ډلې پر یو مرکز هوايي برید وکړ چې پاکستان یاد برید پر خاورې د هند تېری وباله.
پاکستان د هند تر پروني برید وروسته د دغه هېواد د صدر اعظم عمران خان په مشرۍ د ملي امنیت بېړنۍ غونډه راوبلل چې د پاکستان چارواکو په وینا پکې پرېکړه وشوه چې د هند برید ته به په مناسب وخت کې ځواب ورکړي.
