د ښځو کرکټ نړیوال جام سیالۍ د پنجشنبې په ورځ اکتوبر درېیمه (تلې۱۲) په متحدو عربو اماراتو کې پیل شوې.
د نړیوال جام لومړۍ لوبه د سکاتلنډ او بنګله دېش ترمنځ وه، چې بنګله دېش وګټله.
دا لومړی ځل دی چې سکاتلنډ د ښځو د کرکټ لوبډله په نړیوال جام کې برخه اخلي.
د بنګله دېش لوبډلې د پچې له ګټلو وروسته لومړۍ توپ وهنه وکړه او په ټاکل شویو شل اورونو کې یې سکاتلنډ ته د ۱۲۰ منډو هدف وټاکه چې سکاتلنډ یوازې ۱۰۳ منډې وکړې.
د دغې لوبې غوره لوبغاړې د بنګله دېش روتي موني شوه، دې په څلورو اورونو کې دوې لوبغاړې وسوځولې او یوازې ۱۵ منډې پرې وشوې.
د ښځو د کرکټ د نړیوال شل اوریز جام د لومړۍ ورځې په دویمې لوبې کې پاکستان بیا سري لانکا ته ماتې ورکړه.
د سري لانکا لوبډلې د پاکستانۍ لوبډلې د ۱۱۷ منډو په ځواب کې یوازې ۸۵ منډې وکړې.
د دې لوبې غوره لوبغاړې د پاکستان فاطمه سنا شوه، دې په توپ وهنې کې ۳۰ منډې وکړې او په توپ اچوونې کې یې هم دوې مخالفې لوبغاړې وسوځولې.
د کرکټ د نړیوالې شورا د ویبسایټ د معلوماتو په اساس، د نړیوال جام په دویمه ورځ نن جنوبي افریقا له ویسټ انډیز او هند له نیوزلنډ سره لوبې کوي.
د ښځو په روان شل اوریز نړیوال جام کې ټولې لس لوبډلې دي او دا یې نهم ځل دی.
فورم \ دبحث خونه