د ناټو عمومي منشي ینس سټولټنبرګ اعلان کړی چې ناټو به په عراق کې د عراقي عسکرو روزنېز ماموریت پراخ کړي.
سټولټنبرګ چې د پجنشنبې په ورځ [فبرورۍ ۱۵] په بلجیم کې د ناټو د دفاع وزیرانو د غونډې په پاي کې خبرې کولې وویل چې غړي هېوادونه د عراقي اردو لپاره د نویو اکاډمیو او پوځي ښوونځيو په جوړولو کې له حکومت سره مرسته کوي.
ناټو اوس په عراق کې د روزنې یو محدود ماموریت پر مخ بیايي او عراقي پوځيانو ته د ماین د خنثي کولو، په کور کې د جوړو شویو بمونو او د چاودېدونکو موادو د له منځه وړلو په برخو کې ښوونه او روزنه ورکوي.
سټولټنبرګ وایې چې د ناټو پوځیان په عراق کې په جنګي ماموریتونو کې برخه نه اخلي.
د ناټو دیپلومان وایې چې د روزنې په ماموریت کې به ۲۰۰ پرسونل په کار وګمارل شي.
امریکا او ناټو د شاخوا یوې نیمې لسیزې راپدې خوا په افغانستان کې جنګ کوي او په یو وخت کې له څو کلونو راپدې خوا کوښښ کوي چې د افغانستان ملي امنیتي پوځیان وروزي.
د عراق د بیارغونې لپاره مرسته
د عراق د بیارغونې لپاره د کویټ په غونډې کې نن اعلان وشو چې نړیواله ټولنه عراق ته ۳۰ میلیارده ډالر ورکوي په داسې حال کې چې عراق د ۸۸ میلیاردو ډالرو مرستې غوښتنه کړې وه.
د عراق د بهرنیو چارو وزیر ابراهیم الجعفري وویل چې ۳۰ میلیارده ډالر کم دي او پدې پېسو په عراق کې شته ورانۍ نه آبادیږي.
نړیواله ټولنه په داسې حال کې د داعش تر ماتې وروسته په عراق کې د بیارغونې پر پلانونو کار پیل کړی چې امریکايي چارواکي په منځني ختیځ کې د ټُندلارو د خطر پر شته والي اندېښنه ښودلې ده.
