په کندهار کې په نشه یي توکو روږدي وايي چې د سالمې بوختیا د نشتوالي له امله یې نشو ته مخه کړې ده.
یو شمېر هغه معتادین چې تازه په نشو اخته شوي دي وایي که دولت یې د کار غم وخوري نو دا به له دوی سره مرسته وکړي چې له نشو لاس واخلي.
د اروزګان ولایت اوسیدونکی پيرمحمد چې د کرونا له امله د قرنطین پر مهال په نشه يي توکو روږدی شوی اوس له یوه نا معلوم راتلونکي سره مخ دی.
هغه وايي " ۲۵۰۰۰ افغانۍ مې معاش وو، کله کله به یې بونس هم راکاوه چې تر ۳۰۰۰۰ افغانیو به کېدی، خو چې کرونا راغلم بېکاره شوم، اوس پنځوسی هم نه شم پیدا کولای".
بې روزګاري، اقتصادي ستونزې او ځینې نور عوامل ګڼ کسان په نشه د اخته کېدو اساسي لاملونه ګڼي.