په پکتیا کې په نشو د اخته کسانو ورځ تر بلې زیاتوالي اندېښنې راپورته کړې دي، بېکاري او نشه ييتوکو ته اسانه لاسرسی د دې لامل بلل کېږي چې ډېری کسان نشو ته مخه کړي.
د پکتيا د مرکز ګردېز اوسېدونکی ۳۲ کلن محمد زمان د تېرو پنځو کلونو راهيسې په نشه يي توکو روږدی دی، هغه وايي چې لومړی يې چرس څکول، بيا يې شيشه يا کرېسټال او اوس پوډر کاروي.
محمد زمان وايي چې د نشه يي توکو د ترلاسه کولو لپاره په ګردېز ښار کې کباړ ټولي او بيا يې پلوري. ده د بې روزګارۍ له کبله مخدراتو ته پناه وړې، خو ژوند يې ورځ تر بلې له ستونزو سره مخ کېږي.
هغه وايي "په بازار کې کباړ ټولم. د پيپسي او اوبو بوتلونه. تر مازديګر پورې د کور لپاره چای بوره هم وړم او کوښښ کوم چې د خپل ځان لپاره هم يو شی پيدا کړم".
که څه هم کره شمېر نشته، خو د پکتيا د اوسېدونکو اندېښنه دا ده، چې په دې ولايت کې په نشه يي موادو د روږدو کسانو شمېر مخ پر ډېرېدو دی. عمده لاملونه يې بې روزکاري او مخدراتو ته لاسرسی بلل کېږي.
خلک وايي، چې اعتياد نه يواځې د يوه سړي ژوند تباه کوي، بلکې ټولنه هم د اقتصادي ستونزو ترڅنګ له ډېرو نورو مختلفو اجتماعي مشکلاتو سره مخ کوي.