د هلمند سیمهییز چارواکي وايي چې پېښه تېره شپه لس بجې د کندهار – لښکرګاه تر منځ د لويې لارې پر سر د ملي امنیت عمومي ریاست اړوند د پارتیزاني ګروپ پر یوه مرکز رامنځ ته شوې ده.
د هلمند د والي ویاند عمر ځواک امریکاغږ ته وويل په پېښه کې نهه تنه وژل شوي چې پنځه تنه یې نظامیان دي.
هغه زیاته کړه: "دغه راز څلور ملکي کسان دوه ښځې او دوه نارینه چې له سیمي څخه د تیریدو په حال کې وو هم په پېښه کې وژل شوي".
د ښاغلي ځواک په وینا په پېښه کې درې پوځیان او یو ماشوم ټپي شوي هم دي.
پارتیزاني ګروپونه د ملي امنیت اړوند د پاڅونوالو په څېر سرتیري دي چي د هلمند په ګڼو برخو کې فعالیت لري.
عیني شاهدان وايې چې د موټر بم چاودنې څخه وروسته د کندهار – هلمند پر لویه لار د یادو سرتیرو مرکز هم ویجاړ شوی.
د یو بل خبر له مخې د کندهار د شاه ولیکوټ ولسوالۍ امنیه قوماندان سمونوال پاچا خان د سرک غاړې د ماین په چاودنه کې ټپي شوی دی.
د کندهار د پوليسو ویاند جمال بارکزي وویل د شاه ولیکوټ امنیه قوماندان تیره ورځ ناوخته د پوځي عملیاتو پر مهال د سړک د غاړي په ماین چاودنه کې له خپلو ۳ ساتونکو سره ټپي شوی او روغتیايي حالت يې د ډاډ وړ دی.
وسله والو طالبانو د هلمند او کندهار د پېښو په اړه کومه تبصره نده کړې.
