له دوو میاشتو پلټنو وروسته، د امریکا پوځ د پنجشنې په ورځ رسماً ومنله چې د ۲۰۱۶ کال د نوامبر پر ۲-۳ په کندز کې د امریکايي الوتکو په بمباريو کې ۳۳ ملکي خلک ووژل شول او ۲۷ نور ټپیان شول.
په افغانستان کې د امریکايي ځواکونو قوماندان، جان نیکلسن، د بیګناه خلکو د وژل کیدلو له کبله خپله ژوره خواښيني بیان کړې خو د هغو له کورنیو سره یې د مالي مرستو او خواخوږۍ په هکله څه ندي ویلي.
د امریکايي ځواکونو یوه ویاند، بل سالفن، امریکا غږ ته وویل چې د افغانستان دولت د کندز په پيښه کې له زیانمنو شوو کورنیو سره مالي مرستې کړي دي.
د ارګ یو ویاند، شاه حسین مرتضوي، هم وویل چې ولسمشر محمد اشرف غني د زیانمنو شوو کورنیو له استازو سره ولیدل او مالي مرستې يې ورسره وکړې. د دغو مرستو شمیر او نور څرنګولي ندی په ډاګه شوی.
په همدې تړاو د بشري حقونو د څار نړیوال سازمان بیا د امریکا پر پوځ غږ کړی چې د کندز په بمباریو کې له زیانمنو شوو کورنیو سره دي ”پر وخت او په کافي اندازه“ مرستې وکړي.
د دغه سازمان د افغانستان د چارو مشرې څیړونکې، پتریشیا ګاسمن، امریکا غږ ته وویل چې امریکايي ځواکونه باید د ورته پيښو د مخ نیوي لپاره هم پریکنده اقدامات وکړي.
د امریکا پوځ پخوا په افغانستان کې د خپلو پوځي عملیاتو په لړ کې له زیانمنو شوو کورنیو سره مالي او روغتیايي مرستې کړي. دغې مرستې د خواخوږی او غرامت په بڼه پداسې حال کې ورکول کیدې چې افغان حکومت د ملي خلکو د مرګ ژوبلې په غبرګون کې توند دریځ بیانوه.
د افغانستان پخواني ولسمشر حامد کرزي د نړیوالو ځواکونو په پوځي عملیاتو کې د ملکي افغانانو د وژل کیدلو په اړه ډیر بربنډ او غوڅ دریځ درلود او ډیر ځلي يې پر همدې موضوع له واشنګټن سره ډغرې وهلې وې.
