په افغانستان کې د عاشورا مراسمو تر سره کېدو سره هم مهاله نن دوشنبه اګست اتمه (زمري ۱۷) د کابل ښار په زیاتو سیمو کې د مخابراتي شبکو فعالیت بند شوی دی.
د کابل ښار اوسېدونکي شراف الدین امریکا غږ ته وویل چې د تیرې شپې راپدېخوا د دوی په سیمه کې ټلیفوني دستګاوې بندې شوي او انټرنټ هم کار نکوي چې له امله یې خلک له ستونزو سره مخ شوي دي.
که څه هم طالب چارواکو او د مخابراتي شبکو مسؤلینو تر دا مهاله په کابل ښار کې د مخابراتي شبکو بندېدو په اړه څه نه دي ویلي، خو ویل کیږي چې کېدای شي یاد ګام د عاشورا مراسمو د امنیت ټینګولو په هدف اخیستل شوی وي.
د کابل ښار په ځينو سیمو کې مخابراتي شبکې پر داسې مهال بندیږي چې نن دوشنبه د کابل ترڅنګ د افغانستان په یو شمېر ولایتونو کې د افغان اهل تشیع لخوا د عاشورا مراسم تر سره کیږي.
دا په داسې حال کې ده چې د تیرو څو روځو راپدېخوا کابل ښار د څو چاودنو شاهد و چې له امله یې ګڼ شمېر کسان مړه او ټپیان شول.
پر همدې مهال په افغانستان کې د ملګرو ملتونو سیاسي استازوالۍ (یوناما) وايي، په کابل کې د وروستیو چاودنو له امله څه باندې ۱۲۰ کسانو ته مرګ ژوبله اوښتې ده.
یوناما تیره شپه اګست اوومه (زمري ۱۵) پر خپل ټویټر پاڼه لیکلي چې د عاشورا په ورځ د چاودنو مخنیوي لپاره دې د افغانانو امنیت ټینګ شي.
د محرم په رارسېدو سره، کابل په تیرو دوو ورځو کې د دوو چاودنو شاهد و چې له امله یې یو شمېر ملکي وګړي مړه او ټپیان شول.
د طالب چارواکو په وینا، پرون د شنبې په ورځ د کابل ښار د شپږمې امنیتي حوزې اړوند پل سوخته سیمې یو ګلدان کې د ځای پر ځای شوو چاودېدونکو موادو د چاودنې له امله دوه ملکي وګړي وژل شوي او ۲۲ نور ټپیان شوي دي. خو ځينو روغتیايي سرچینو بیا ویلي چې په دغه چاودنه کې ۸ کسان وژل شوي دي.
له دې یوه ورځ وړاندې، د جمعې په ورځ هم د کابل ښار د شپږمې امنیتي حوزې اړوند «سرکارېز» سیمه کې د چاودنې له امله د ۸ کسانو د وژل کېدو او ۱۸ نورو د ټپي کېدو راپور ورکړل شو.
د داعش ـ خراسان څانګې د دغه دواړو چاودنو د مسؤلیت ادعا کړې ده.
په افغانستان کې د ملګرو ملتونو سیاسي استازولۍ (یوناما) تر دې مخکې هم دغه چاودنې غندلي وې او د قربانیانو له کورنیو سره یې غم شریکي ښودلې وه.
یوناما زیاته کړې ده: "حاکم چارواکي باید د ورته بریدونو مخنیوی وکړي او په اړه یې شفاف او بشپړه تحقیقات وکړي."
تیره ورځ د اسلامي همکاریو سازمان هم د طالبانو له حکومت څخه غوښتي و چې د ورته چاودنو او ملکي وګړو د مرګ ژوبلې د مخنیوي په برخه کې جدي اقدام وکړي. ویل کیږي چې په دغه چاودنو کې افغان اهل تشیع وګړي په نښه شوي دي.
