په ننګرهار کې چارواکي وایي د اچین په ولسوالۍ کې، چې داعش جګړه ماران په کې دي، جلدي او نورې ناروغې پیدا او زیاتې شوي دي.
چارواکي وايي د دغو ناروغیو علت تر ډېره په سیمه کې د داعش او نورو اورپکو پر ضد او د اورپکو لخوا د چاودیدونکو توکیو او وسلو استعمالول او روان جنګ دي.
په همدغې سیمې کې امریکايي ځواکونود داعش پر مرکزونو او څمڅو د بمونو د مور په نامه یو لوی بمب هم وغورځوه، چې هغه وخت یو شمېر خلکو انتقاد کاوه چې دا شاید دا بمب چاپېریال خراب کړي.
مګر هغه وخت د افغانستان د عامې روغتیا وزارت ویلي وو چې د دغه بمب د استعمال له کبله د روانې او نورو ناروغیو کوم خطر نشته.
په اچین کې د شډل کلینیک آمر ډاکټر محمد داود امریکا غږ اشنا ته وویل چې په دې وروستیو کې د ورځې د ۱۲۰ او ۱۵۰ ترمنځ ناروغان چې ډېر یې جلدي او روانې رنځونه لري، کلینک ته یې ورځي.
هغه وویل چې د ډېرو دا ډول ناروغیو علت د بمونو او نورو وسلو استعمال دی چې فضا یې ککړه کړې ده. ده وویل چې له همدې کبله یو شمېر نور خلک د سترګو په ناروغۍ اخته شوي دي.
نوموړي همدغه راز اندېښنه وښودله چې د سیمې یو شمېر خلک په رواني ناروغۍ هم اخته شوي او په خبره یې دا ډول مریضان مخ په زیاتېدو دي، هغه د دقیق ارقام ورنکړل چې څومره کسان له دې کبله رنځوران شوي.
د اچین ولسوال محمد اسماعیل امریکا غږ اشنا ته وویل له داعش څخه یو شمېر پاکې شوې سیمې د ژوند لپاره مناسبې دي خو ډېرې نورې سیمې بیا نه دي، هغه وویل روانو جنګونو چاپېریال ککړ کړی دی.
داعش له شاوخوا دوو کلونو راهېسې د ننګرهار په ځینو سیمو کې فعاله دی، په دې وروستیو کې یې تورې بوړې ته هم ځانونه نژدې کړې وو، خو افغان ځواکونو وشړل.
