د عراق پوځ وایي په موصل کې یې د النور لرغونی ویجاړ شوی جومات ونیو چې درې کاله مخکې په کې ابوبکر البغدادي خپل خلافت اعلان کړی و.
د عراق پوځ وایي د موصل ښار دننه د اته میاشتنۍ جگړې وروسته د عراق حکومتي ځواکونو د پنجشنبې په ورځ د موصل لرغونی جومات چې د اسلامي دولت ډلې په کې خپل خلافت اعلان کړی و، له داعش نه ونیو.
عراقي مقامات اټکل کوي چې د موصل ښار د نیولو اوږده جگړه به په څو راتلونکو ورځو کې پای ته ورسیږي. دوی وایي چې د اسلامي دولت د ډلې جنگیالي اوس د زاړه ښار په شاوخوا کې څو ځایه په جگړه بوخت دي.
د النوري جامع جومات نیول چې لرغنتوب یې ٨٥٠ کالو ته رسیږي د عراقي ځواکونو لپاره یوه سمبولیکه بریا ده چې د موصل د نیولو هڅه کوي.
د عراق د پوځ ویاند برید جنرال یحیی رسول دولتي تلویزیون ته وویل د داعش "جعلي دولت ونړید".
داعشیانو د منځنیو پیړیو دغه لرغوني جومات تیره اونۍ په داسې حال کې والوزاوه چې د امریکا په ملاتړ عراقي قواوی ددې جومات پر لور پرمخ ولاړې. د ٢٠١۴ کال د جون راهیسې د داعش تور بیرغ پر دغه جومات ځړیده.
د داعش نه د موصل ښار نیول به ددې ډلې د خلافت نیمایي برخه ړنگه شي، په داسې حال کې چې دغه سخت دریځه ډله د موصل په جنوب او لویدیځ په ځنې برخو کنترول لري. د سوریې په رقه کې هم د داعش مرکز د سوریې د دموکراتیکو قواو تر محاصرې لاندې دی چې کردان یې یوه برخه ده او امریکایي ملاتړ کوي.
ستر تاوان
د سخت دریځو نه د موصل ښار د بیرته نیولو لگښت خورا زیات و. د پوځیانو له مرگ ژوبلې اخوا په زرگونو ملکي وگړي ددې ښار په جگړه کې ووژل شول.
د موصل ښار شاوخوا ۹۰۰ زره وگړي چې ددې ښار د نفوس نژدې نیمایي برخه ده، د پوځي عملیاتو دمخه له ښار نه بې ځایه شوي دي په کمپونو او یا هم د عراق په مخختلفو سیمو کې د خپلوانو او دوستانو په کورونو کې ژوند کوي.
هغوی چې د موصل ښار په جگړه کې گیر پاته دي له لوږې او سخت محرومیت سره مخامخ دي چیې په زرگونو یې وژل شوي یا هم ټپي شوي دي.
د عراق پوځ وایي چې په تیره یوه اونۍ کې د موصل په زاړه ښار کې د داعش زیات شمیر جنگیالي وژل شوي، خو شاوخوا ۳۵۰ تنه داعشیان لا هم د موصل په زاړه ښار کې په جگړه بوخت دي.
