د سره صلیب نړیوالې کمېټې په افغانستان کې له جګړو څخه د پاتې ناچاوده مهماتو د چاودنو له امله د مرګ ژوبلې زیاتېدو په اړه اندېښنه ښودلې او په دې برخه کې د زیاتې پاملرنې غوښتنه کړې ده.
په افغانستان کې د سره صلیبی نړیوالې کمېټې مشر ایلوا فیلیون د دوشنبې په ورځ اپرېل څلورمه(وري ۱۵) پر خپل ټویټر پاڼه لیکلي چې د ۲۰۲۲ میلادي کال د جنورۍ میاشتې له پيل څخه بیا تر دا مهاله په افغانستان کې د ناچاوده مهماتو د چاودنې له امله ۲۰۰ کسانو ته مرګ ژوبله اوښتې ده.
نن د اپریل د میاشتې څلورمه د ماین په اړه د پوهاوي او د ماین د قربانیانو سره د مرستې نړیواله ورځ ده.
فیلیون نه دي ویلي چې د چاوده مهماتو د چاودنې له امله څومره کسان مړه او څومره ټپیان شوي دي، خو ټینګار یې کړی چې نیمايي قربانیان یې ماشومان دي.
په افغانستان کې د سره صلیب نړیوالې کمېټې د دفتر مشر ټینګار کړی دی چې باید په افغانستان کې د جګړو له امله پاتې ناچاوده مهمات ټول شي او سیمې پاکې شي چې افغانان خوندي ژوند وکړي.
درې ورځې مخکې د هلمند ولایت په مارجې ولسوالۍ کې د هاروان مرمۍ د چاودنې له امله پنځه ماشومان ووژل شول او دوه تنه نور ټپیان شول.
د هلمند ولایت سیمه ییزو مسؤلینوو ویلي چې د دغه ماشومانو عمرونه د درې او ۱۲ کلونو ترمنځ و. د دوی په وینا یادو ماشومانو د هاوان دغه مرمۍ د مارجې ولسوالۍ په سیمه کې پیدا کړې وه چې د لوبو پرمهال یې چاودنه کړې ده.
افغانستان اوس هم د ماشومانو لپاره خطر ناک هېواد بلل کېږي.
دا په داسې حال کیده چې د ملګرو ملتونو د ماشومانو د ملاتړ صندوق (یونیسف) هم وړمه ورځ په افغانستان کې له جګړو څخه د پاتې شویو ناچاودو توکو چاودنو له امله د ماشومانو د مرګ ژوبلې په اړه اندېښنه څرګنده کړې وه.
یونیسف د شنبې په ورځ ناوخته اپرېل دوهمه (وري ۱۳) په یوې اعلامیې کې ویلي چې په تیرو اوو میاشتو کې په افغانستان کې د پاتې شوو نا چاوده توکو د چاودنې له امله ۳۰۱ ماشومانو ته مرګ ژوبله رسېدلې ده.
یونیسف ویلي: "په افغانستان کې ماشومان د ناچاوده توکو له امله د مرګ له ګواښ سره مخ دي، ځکه ډېر کله ماشومانو د خپلو کورنیو د مالي ملاتړ لپاره هڅه کوي چې اوسپني او نور فلزي توکي پيدا او وپلوري."
یونیسف په افغانستان کې له ټولو اړخونو څخه غوښتي چې له جګړې څخه د پاتې ناچاوده مهماتو په پاکولو کې لاس په کار شي، تر څو د انساني مرګ ژوبلې مخه ونیول شي.
دا په داسې حال کې ده چې تر دې مخکې ملګرو ملتونو ویلي وو په ۲۰۲۰ میلادي کال کې په نړۍ کې د ناچاوده مهاتو د چاودنو له کبله ۳۹۰۰ ماشومانو خپل ژوند له لاسه ورکړی دی.
دغه سازمان همدارنګه ویلي چې د۲۰۲۱ میلادي په لومړیو شپږ میاشتو کې په افغانستان کې څه باندې ۴۶۰ماشومان د تاوتریخوالي په ځانګړي ډول د ناچاوده مهماتو د چاودنو له امله وژل شوي دي.