په انګلستان کې د ۲۰۱۹ کال د نړیوال جام د دویم پړاو ته څلور لوبډلې ووتلې خو تر اوسه دا نده معلومه چې کوم هیواد به د کوم هیواد سره لوبه کوي.
د نومرو یا پواینټونو په جدول کې تر اوسه د آسټرالیا لوبډله لومړی، هند دویم، انګلستان دریم او نیوزلینډ څلورم مقام لري. د کرکټ د نړیوالې شورا د پریکړې له مخې د لسو لوبډلو د جملې نه یوازې هغه څلور لوبډلې نیمه پای لوبې یا سیمې فاینل ته اوځي چې د جدول د سر په څلورو لوبډلو کې راشي.
پاکستان خپله نهمه او وروستۍ لوبه د بنګله دیش نه وګټله او پنځم مقام یې وګاټه. د پاکستان او نیوزلینډ نومرې برابرې دي. دواړو یې یوولس یوولس پواینټونه لري خو په رن ریټ کې پاکستان د نیوزلینډ نه شاته دی او په همدې خاطر نشي کولی چې سیمي فاینل ته ووځي.
د اسټرالیا او هند دوه لوبې پاتي دي او تر اوسه نده معلومه چې کومه لوبډله به د نومرو په جدول کې لومړی مقام وګټي.
نیمه پای لوبې یا سیمې فاینل
دا چې کومه لوبډله به د کومې لوبډلې سره په نیمه پای لوبې یا سیمې فاینل کې مخامخ کیږي، دا پریکړه د هند - سریلانکا او آسټرالیا - جنوبي افریقا د لوبو نه وروسته معلومیږي. که اسټرالیا جنوبي افریقا ته ماتې ورکړي پدې سره یې نومرې شپاړلس کیږي او په پای لوبې کې د نیوزلینډ سره مخ کیږي.
د جنوبي افریقا او اسټرالیا لوبه سبا ته ده. او که اسټرالیا دا لوبه وبایلي په سیمې فاینل کې بیا د انګلستان سره مخ کیږي ځکه چې د جدول لومړی مقام لرونکې لوبډله د څلورم او د دویم مقام د دریم سره لوبه کوي. د هند او سریلانکا لوبه بیا د شنبې په ورځ (جولای ۷مه) ده.
