د هرات ولایتي چارواکي وايي، د دغه ولایت د زنده جان ولسوال شکر الله شاکر نن د شنبې په ورځ ( زمري ۱۲ مه) د سړک د غاړې د ماین په چاودنه کې وژل شوی دی.
د هرات د امنیه قومندانۍ د رسنیو مسول فرزاد فروتن امریکا غږ اشنا راډیو ته وویل،چې د ولسوال شاکر د سپرلۍ پر موټر دا چاودنه د زنده جان د ولسوالۍ د " ترکه وچاه ظلم اباد" د سیمو ترمنځ شوې، چې له امله ولسوال شاکر او د هغه یو ساتوونکی وژل شوي او پنځه نور ساتوونکي ټپیان شوي دي.
ښاغلي فروتن وویل، چې دا ماین د وسله والو مخالفانو له تازه پر دغه سړک کې ښخ شوی وو.
خو د هرات ولایت یو سیمه ییز چارواکي امریکا غږ اشنا راډیو ته وویل، چې په دې چاودنه کې د زنده جان د ولسوال یو ورور او یو ساتوونکی وژل شوي او درې نور ساتوونکي یې ژوبل شوي د ي.
تراوسه کومې وسله والې ډلې د زنده جان د ولسوالۍ د ولسوال د وژلو مسولیت په غاړه نه دی اخیستی.