د هلمند سیمه ییز چارواکي وايي چې په باباجي سیمه کې د ګډو افغان ځواکونو په پيل شویو عملیاتو کې ۷ تنه وسله وال طالبان او یو تن هم د ملي پوځ سرتېری وژل شوی.
ګډو افغان ځواکونو د لښکرګاه ښار او نادعلي ولسوالۍ ترمنځ د پرتو سیمو د امنیت لپاره پراخ پوځي عملیات تېره شپه پيل کړي.
د هلمند د والي ویاند عمر ځواک د چهارشنبې په ورځ د «لېندۍ پر۱۴مه» اشنا راډیو ته وويل چې د یادو عملیاتو په ترڅ کې د نادعلي ولسوالۍ د شنې جامع، چانجیر، آب پاشک ،ناقل اباد او لوی مانده سیمې په بشپړه توګه د دولت د وسله والو مخالفینو له حضور څخه پاکې شوي دي.
دی زیاته وي چې په یادو سیمو کې د امنیتي قواوو ګډي امنیتي پوستې هم ځای پر ځای شوي دي.
څواک وويل:"په عملیاتو کې ۷ تنه وسله وال او یو د ملي پوځ سرتېری وژل شوی، په دې عملیاتو کې چې تېره شپه پيل شوي عمده موخه د باباجي د سیمې امنیت دی چې هم د لښکرګاه ښار او هم د نادعلي ولسوالۍ د امنیت لپاره ارزښت لري، سیمه ییز خلګ هم د امنیتي قواوو سره همکار دي او پيل شوي عملیات چې د پوځ پوليسو او ملي امنیت قواوو پکې برخه لري تر هغو به دوام ولري چې د باباجي سیمه په بشپړه توګه تصفیه کېږي."
یاد چارواکي وايي، چې د دغو پوځي عملیاتو اساسي موخه د د لښکرګاه ښار په شمالي برخه کې د ښار د څلورمې امنیتي حوزې اړوند باباجي سیمه ده چې له تېرو ۲ کالو راهیسې له دولتي حاکمیت څخه وتلې ده.
له یادي سیمې څخه د ګرښک او لښکرګاه لار هم تېره شوې چې د ناامنیو له کبله یاده لار هم د ټرافیکو پرمخ تړل شوې.
د هلمند د والي ویاند زیاته وي چې ولایتي اداره د باباجي په سیمه کې د امنیت را وستلو ته ډېر پاملرنه لري.
په یاده سیمه کې څو ځله د سرحدي پوليسو او ملي اوردو پر مرکزونو باندي موټر بم ځان وژونکې بریدونه هم شوي چې د لښکرګاه ښار ته لوی ګواښ بلل کېده.
تېره اونۍ په یاده سیمه کې د یوه هوايي برید په ترڅ کې ۱۶ تنه ملکي کسان وژل شوي وو.
خپله وسله والو طالبانو تر اوسه د باباجي د عملیاتو په اړه کومه تبصره نه ده کړې.
