د متحده ایالاتو د وسلهوالو قواو عمومي لوی درستیز جنرال مارک میلي وايي چې د افغانستان د کابو نیمايي ولسوالیو مرکزونه د طالبانو په لاس کې دي.
دغه امریکايي جنرال د چهارشنبې په ورځ د جولای ۲۱ (چنګاښ ۳۰) په واشنګټن کې خبریالانو ته وویل چې د افغانستان د ۴۱۹ ولسوالیو د مرکزونو له شمېرې څه باندې ۲۰۰ مرکزونه د طالبانو په لاس کې دي.
د متحده ایالاتو د وسلهوالو قواو عمومي لوی درستیز دغه راز وویل داسې برېښي چې ستراتيژیک وضعیت په یو ډول د طالبانو په ګټه وي.
د جنرال میلي په وینا که څه هم طالبان تراوسه د ولایتونو د مرکزونو په نیولو بریالي شوي نه دي خو د دغې ډلې جنګیالیو د سم نیمايي ولایتونو د مرکزونو په شاوخوا کې خپل بریدونه زیات کړي دي.
دا څرګندونې په داسې مهال کېږي چې د افغانستان جمهور رئيس محمداشرف غني د چهارشنبې په ورځ وویل حکومت به یې له درېیو څخه تر شپږو میاشتو پورې د روانې جګړې د وضعیت په مدیریتولو باندې تمرکز وکړي.
جمهور رئیس غني هیله څرګنده کړه چې د ځانګړو طرحو او برنامو په اساس به په افغانستان کې امنیتي وضعیت ژر بدلون ومومي.
د افغانستان حکومت همداشان د یکشنبې په ورځ له طالبانو څخه د ۲۴ ولسوالیو د مرکزونو د بېرته نیول خبر ورکړ.
د افغانستان د وسلهوالو ځواکونو ویاند جنرال اجمل عمر شینواري وویل چې افغان ځواکونه د دغه هېواد په زیاترو سیمو کې له دفاعي حالت څخه یرغلیز حالت ته وتلي دي او له لاسه تللې سیمې به بېرته له طالبانو څخه ونیسي.
