د روغتیا نړیوال سازمان وايي د طالبانو له لوري د کابل تر نیول کېدو وروسته په لومړي ځل یې د طبي وسائیلو د مرستو لومړۍ الوتکه او جوپه افغانستان ته ورسېدله.
د روغتیا نړیوال سازمان وايي چې د پاکستان هوايي کرښې دا الوتکه تنظیم کړې وه چې له دوبۍ څخه یې ۱۲.۵ میلیون طبي وسائیل او تجهیزات د افغانستان د مزار ښار ته انتقال کړل.
د مدیترانې په لویدیځ کې د روغتیا د نړیوال سازمان مسئول احمد المندهاري د دوشنبې په ورځ اګست ۳۰ (وږي۸) وویل چې له پرلپسې مذاکراتو وروسته بالاخره د طبي زیرمو د ډکولو او د نړیوال روغتیا د سازمان د خدمتونو د روانو ساتلو لپاره د حل یوه لاره پیدا شوه.
د روغتیا د نړیوال سازمان چارواکو همدغه رازافغانستان ته د طبي وسائیلو د انتقال لپاره د هوايي پل د جوړولو غوښتنه کړې ده.
د روغتیا نړیوال سازمان د جمعې په ورځ خبرداری ورکړی و چې د طالبانو له لوري د افغانستان تر نیول کېدو وروسته په هغه هېواد کې د دغه سازمان طبي وسائیل او تجهیزات مخې په خلاصېدو دي.
د روغتیا نړیوال سازمان وايي چې افغانستان ته تازه انتقال شوي طبي وسائیل او تجهیزات به د دغه هېواد ۲۹ ولایتونو ته انتقالیږي چې ورسره به د ۲۰۰زره کسانو ابتدايي روغتیايي ضرورتونه حل شي.
په همدې حال کې ملګرو ملتونو د کډوالو عالي کمېشنري وايي چې له افغانستان څخه د تخلیې د ماموریت په ختمېدو سره په هغه هېواد کې 'لوی بشري ناورین' په پیلېدو دی.
