د ایران منزوي بازارونه ډالرو ته سخته اړتیا لري او افغانان د ورځې شاوخوا درې میلیونه ډالر ایران ته قاچاق کوي.
له کومې ورځې چې امریکا له ایران سره له شوي اتمي تړون په شا شوې، د ایران اقتصادي او مالي حالت مخ په ځوړ دی.
د اسعارو د تبادلې په مارکیټونو کې د ډالرو په وړاندې د ایراني ریال لویدلو په ایران کې پراخې اندېښې پارولي دي. ریال د ډالرو په وړاندې ۴۰سلنه لویدلی دی او ایران د خپلو مالي بازارونو د ثبات لپاره بهرنیو اسعارو ته اړتیا لري.
اوس داسې ښکاري چې د ایران دغه اړتیا یو شمېر افغانان ور پوره کوي. د رویټرز د خبري اژانس په راپور افغانان چې د خپل هېواد اقتصاد يې پر امریکايي ډالرو ولاړ دی، د ورځې شاوخوا درې میلیونه ډالر په ناقانونه ډول ایران ته وړي.
د هرات په ولایت کې، چې له ایران سره پوله لري، د احمد خان په نامه یو کس وايي چې د مسافرو د لیږدولو تر څنګ د ورځې د پنځو او شپږو زرو ډالرو ترمنځ مشهد ته وړي او د اسعارو په تبادله کې ۱۰۰ ډالره ګټه کوي.
د ایران د قانون له مخې هر څوک چې دغه هېواد ته ځي یوازې د ۱۰یورو د وړلو حق لري چې ۱۱۶۹۲ ډالر کیږي او کولی شي چې بهرني اسعار د ایران په بانکونونو په رسمي قیمت تبادله کړي.
دا مهال د ایران په بازارونو کې یو امریکايي ډالر په ۴۲۴۵۰ ایراني ریال تبادله کیږي خو په ازادو بازارنو کې بیا د یو ډالر قیمت ۷۷۰۰۰ ریاله دی.
ایراني چارواکو خبرداری ورکړی که هر چا له رسمي نرخ پرته ډالر تبادله کړ، وبه نیول شي.
