د افغانستان د روغتیا وزارت وايي چې په یوه شپه او ورځ کې په افغانستان کې ۷۶ کسان په کروناویروس اخته شوي او پنځه کسه نور له دغې ناروغۍ مړه شوي دي.
د دغه وزارت د رسمي شمیرو په اساس د تازه پېښو په ثبت سره په افغانستان کې د کروناویروس د ټولو مثبتو پېښو شمیر څه باندې ۵۷زرو ته پورته شوی او دوه زره او ۵۲۱ کسه د کرونا له امله مړه شوي دي.
د روغتیا وزارت ویلي چې د کروناویروس تازه مثبتې پېښې په ۱۴ ولایتونو کې ثبت شوي دي.
همداشان د دغه وزارت معلومات ښيي چې په افغانستان کې د کروناویروس وبا له پیل څخه تراوسه شاوخوا ۵۲زره کسان له دغې ناروغۍ بېرته روغ شوي دي.
په عین حال کې افغان چارواکو د پوهنتونونو په کچه د کروناویروس د واکسین د تطبیق خبر ورکړی دی.
د افغانستان د لوړو زدهکړو وزیر عباس بصیر وویل چې دا بهیر له کابل پوهنتون څخه پیل شوی او د دغه هېواد نورو پوهنتونونو ته به هم وغځول شي.
ښاغلي بصیر وویل چې په لومړي سر کې به د ټولو پوهنتونو استادانو ته واکسین وشي او له هغې وروسته به دا واکسین محصلینو ته هم ورکړل شي.
د کروناویروس د لومړي ځل لپاره د ۲۰۱۹ په ډسمبر کې د چین د هوبي ایالت په ووهان ښار کې پیدا او په چټکۍ سره ټولې نړۍ ته ورسېد.
د امریکا د جانس هاپکینز پوهنتون د معلوماتو په اساس تراوسه په نړۍ کې څه باندې ۱۳۳میلیونه او ۲۷۰زره کسان په کروناویروس اخته شوي چې له دې شمېرې کابو دوه میلیونه او ۸۹۱زره کسان مړه شوي دي.
