امریکاغږ د آي اين ايل په مرسته په کندهار کې د نشه يې توکو سره په مبارزه کې د رسنیو د ونډي تر عنوان لاندي یو ورځنی کنفرانس جوړ کړ.
په کندهار کې د امریکاغږ له لوري یو ورځني کنفرانس د "بدیل کرهڼيز توکي او د بدیل معیشت پروژې" تر عنوان لاندې جوړ شوی و چې د چارواکو تر څنګ بزګرانو او ځمکه والو پکې ګډون کړی و.
د کندهار والي حیات الله حیات دې کنفرانس ته وويل چې د زراعتي محصولاتو د خوندي ساتلو لپاره به په کندهار کې د شنو خونو یا ګرین هاوسونو جوړیدو ته ډير پام وشي.
نوموړي وويل چې د کروندګرو لپاره د بدیل معیشت په پروګرامونو کې به د راتلونکې لپاره پر بنیادي پروژو کار وکړي.
د کندهار د ګرهڼي او مالدارۍ رئیس سید حفیظ الله سیدي دې کنفرانس ته وويل چې د کندهار هوا او اوبه د پیاوړي زراعت لپاره مساعد شرایط لري چې کولای شي د هیواد اقتصاد په پښو ودروي.
خپله کروندګر د زراعت په سکتور کې د هغو تجربو یادونه کوي چې د کوکنارو غوره بدیل ګرځیدلی. د پروګرام ګډون کونکو ځمکه والو غوښتنه وکړه چې زراعتي محصولاتو ته دي په بازار موندنه کې پام زیات شي.
د کندهار د کلیو د بیا رغاونې او پراختیا رئیس انجنیر محمد نسیم ایوبي وايې چې اداره يې د کلیو د انکشافي پروژو په برخه کې د زراعت ودې ته خاصه پاملرنه کوي.
د امریکا غږ په استازیتوب په کندهار کې د نشه يي توکو سره په مبارزه کې د رسنیو د ونډې د کنفرانس جوړونکي رحیم ګل څاروان وویل چې امریکاغږ غواړي د رسنیو له لاري د نشه يي توکو پر ضد مبارزه وکړي.
ټاکل شوې چې تر کندهار وروسته په کابل، مزارشریف او ننګرهار ولایتونو کې هم د نشه يي توکو پرضد د مبارزه د رسنیو د ونډې په موخه کنفرانسونه جوړ شي.
