د هرات سیمهییز چارواکي وايي چې ایران د دواړو هېوادونو ترمنځ د اسلام قلعه دروازه د مسافرو د تګ راتګ پر مخ تړلې ده.
دا تصمیم په ایران کې د کروناویروس د دویمې بڼې د پېښو له زیاتوالي وروسته نیول شوی دی.
د هرات د والي ویاند جیلاني فرهاد وویل چې دا تصمیم د پنجشنبې په ورځ اپریل ۲۹ (غويي ۹) عملي شوی او لا څرګنده نه ده چې دا لاره به کله بېرته پرانیستل شي.
د هرات د بهرنیو اړیکو رئیس امین الله ازاداني وویل چې د ایران حکومت د مصوبې له مخې د کروناویروس په پېښو کې د بېساري زیاتوالي له امله د ایران او افغانستان ترمنځ د مسافرو تګ راتګ تر راتلونکې خبرتیا پورې بند شوی دی.
ښاغلي ازاداني زیاته کړه چې د دواړو هېوادونو ترمنځ یوازې هغو موټرو ته د تګ راتګ اجازه ورکول کېږي چې سوداګریز توکي انتقالوي.
په وروستیو ورځو کې په ایران کې د کروناویروس د نوې بڼې پېښې په بېساري توګه زیاتې شوې دي. د دغه هېواد روغتیايي چارواکو له خپل حکومت څخه غوښتي چې ټولې هوايي، ځمکنۍ او سمندري لارې د مسافرو د تګ راتګ پر مخ وتړي.
