له ٢٥ کلونو وروسته په راروانې نوامبر میاشت کې په برما کې پارلماني انتخابات ترسره کیږي او د بودایانو یوه سختدریځه ډله هڅه کوي چې هغه کاندیدان پارلمان ته لار ومومي چې د مسلمانانو مخالفه دي.
د دغې ډلې مشر اشین تلوکار بیونسا وايي " ځینې خلک په ځانگړې توگه مسلمانان د بودیزم د کمزورتیا هڅه کوي، نو مونږ د خپل مذهب لپاره قوي خلکو ته اړتیا لرو".
د ښاغلي بیونسا سخت دریځه بودایي ډلې تر اوسه په انتخاباتو کې د گډون په اړه څه نه دي ویلي، خو وایي دوی به د هغو کاندیدانو په اړه خلکو ته پوهاوی ورکړي چې د دوی له دریځ سره مخالفت کوي.
په دې وروستیو کې د برما پارلمان هغه څلور قوانین تصویب کړل چې یوې بودایي سخت دریځه ډلې وړاندې کړې وه. منتقدین وایي دغو نويو قوانینو کې د ښځو او د مسلمانانو پر ضد تبیعض ته قانوني بڼه ورکړل شوې ده.
برما کې لا د وړاندې د لږکیو مسلمانانو په خلاف د سختدریځو بودایانو د زورزیاتیو په اړه پراخې اندیښنې شته. د بشري حقونو ځينو سازمانونو آن د برما حکومت پدې تورن کړی چې د مسلمانانو ناورین ته سمه پاملرنه نه کوي.
داسې اندیښنې هم شته چې سیاسي نظام ته د اورپکو بودایانو له ورتګ سره به په برما کې د مسلمانانو حالت نور هم وران شي.
د برما نفوس څه باندې ۵۳ میلیونه اټکل کیږي او پدوې کې ۸-۱۲ فیصده مسلمانان ګڼل کیږي.