د پاکستان امنیتي چارواکي وايي، د بلوچستان مرکز کویټه کې ماین چاودنې لږ تر لږه څلور کسان وژلي او ۱۵ نور یې ټپیان کړي دي.
دا چاودنه پرون پنجشنبه ډسمبر ۳۰ (مرغومې نهمه) د دغه ایالت مرکز کې پر داسې مهال شوې چې لږ مخکې په یاده سیمه کې د جمعیت علماء اسلام ډلې د پلویانو غونډه پای ته رسېدلې وه.
دغه چاودنه پر جناح سړک د کوټې د ساینس پوهنتون د مرکزي دروازې مخته شوې ده.
د بلوچستان امنیتي چارواکو ویلي چې چاودنه له لیري د ریموټ کنټرول ماین په واسطه شوې ده چې هدف د یادې ډلې مشران او کار کوونکي و.
د ځايي چارواکو له قوله په دغه چاودنه کې وژل شوي او ټپي شوي کسان هم د جمعیت علماء اسلام ډلې پلویان او شاګردان دي.
د سیمه ییز روغتون یو مسؤل ویلي چې دوی ته د پېښې له ځایه څلور جسدونه او ۱۵ ټپيان وروړل شوي چې د څلورو ټپيانو حالت نازک دی.
د پاکستان امنیتي چارواکو دغه برید «تروریستي» بللی او زیاته کړې ده چې عاملین به یې د قانون منګلو ته وسپارل شي.
تر دا مهاله د دغه چاودنې مسؤلیت کومې وسله والې ډلې نه دی منلی.
د پاکستان بلوچستان ایالت په ۲۰۲۱ میلادي کال کې د ۲۶۲ امنیتي پېښو شاهد و چې په دغه چاودنو او وسله والو بریدونو کې لږ تر لږه ۱۴۴ کسان وژل شوي او شاوخوا ۵۰۰ نور ټپیان شوي دي.
د ګازو او منرال لرونکی بلوچستان ایالت په تیرو دوو لسیزو کې د وسله والو فعالیتونو شاهد دی.
بلوڅ بېلتون پال هم له کلونو په دغه ایالت کې د خپلو حقوقو لپاره وسله واله مبارزه کوي او د پاکستان حکومت د خپلو حقوقو په خوړلو او تعصیب تورنوي. دوی زیاتوي چې د پاکستان حکومت د دغه ایالت له ګازو او منرالو څخه استفاده کوي، خو د دغه ایالت بیا رغولو ته توجه نکوي.
