د روسیې د جمهور رئیس ولادیمیر پوتین سرسخته منتقد الکسي نوالني ویلي تر څو یې چې د ملا درد او د پښو د بې حسۍ په خاطر سمه درملنه پیل نشي، غذایي اعتصاب کوي.
ښاغلی ناوالني پدې تورن دی چې په ۲۰۱۴ کال کې یې د تعلیقي حبس شرایط له پامه غورځولي او د اختلاس په تور اوس په ۳ کاله بند محکوم شوی دی.
ښاغلي ناوالني د چهارشنبې په ورځ مارچ ۳۱ (وري ۱۱) په خپل انستګرام کې لیکلي: "ما اعتصاب کړی دی چې قانون پلی شي او یو ډاکتر ته اجازه ورکړل شي چې ما معاینه کړي."
هغه همداشان ویلي دي چې د درملنې پر ځای په " کم خوبۍ شکنجه کیږي".
الکسي نوالني لږ وروسته له هغې چې د جنورۍ په ۱۷ له جرمني څخه د مسکو یو هوایي ډګر ته ورسید ونیول شو. هغه تیر کال په روسیه کې د مسموم کیدو وروسته جرمني ته د درملنې لپاره انتقال شوی و.
ښاغلی ناوالني وایي کرملین د هغه د مسمومولو مسول دی او تور یې لګولی دی چې د روسیې جمهور رئیس ولادیمیر پوتین د هغه د وژلو امر کړی دی؛ هغه تور چې کرملین په وار وار رد کړی دی.
د ښاغلي ناوالني له نیول کیدو وروسته د هغه ملاتړو په پلازمینه مسکو او نورو ښارونو کې پراخې مظاهرې وکړې او د هغه ازادیدل یې وغوښتل. خو دغه مظاهرې د پولیسو له سخت غبرګون سره مخامخ شوې او د الکسي ناوالني په زرګونو پلویان پولیسو ونیول.
د امریکا متحده ایالات او د هغې لویدیځ متحدین د الکسي ناوالني زنداني کیدل او د هغه د پلویانو سره د پولیسو چلند سخت غندلی دی او پر روسیې باندې یې د بندیزونو لګولوړ هڅه کړې ده.
