د ښځو چارو وزارت مرستیاله سپوږمۍ وردگ وايي چې د دې وزارت استازي هم د شکنجې د مخنیوي په کمیسیون کې غړیتوب لري اود دغه کمیسیون د غړو سره په ولایتونو کې د بندیانو د وضعیت د ارزولو لپاره یو شمیر ولایتونو ته سفرونه کوي.هغه زیاتوي چې دې پخپله د دغو سفرونو په لړ کې په وروستي ځل د کندهار ولایت د نارینو او د ښځو زندانونه لیدلي.
میرمن وردک وویل " ما د ښځو په برخه کې ډیر بدلون ولید، د ښځو زندان د ساتوونکو چلند د ښځو بندیانو سره په فوق العاده ډول ښه شوی او هم د هغوی د خوړو او اعاشې په برخه کې مثبت بدلون راغلی دی. کوم خواړه، چې د زندان ساتوونکي یې خوړي، هغه خواړه بندیانو ته هم ورکوي".
د افغانستان د ښځو چارو وزارت مرستیالې وویل، چې د جمهور رئیس محمد اشرف غني د " فوق العاده" فرمان پر اساس په ۲۴ ساعتونو کې د ښځو د زندانونو کارکوونکو ته ۱۳۵ افغانۍ ورکول کیږي او په همدې اندازه پیسې زنانه بندیانو ته هم ورکول کیږي، د دې لپاره، چې د میرمن وردک پر وینا د یو شمیر ښځینه بندیانو سره د هغوی ماشومان هم په زندانونو کې ژوند کوي.
ښځو چارو وزارت دغې چارواکې د ښځو زندانونو کې ماشومانو ته د وړکتونونو جوړیدل هم د یو ښه پرمختګ په توګه یادکړ، خو ویې ویل، چې د کندهار د ښځو زندان کې لا د وړکتون د ښوونکې د ګمارلو په برخه کې ستونزه نه ده هواره شوې.
د کورنیو چارو وزارت د زندانونو او توقیف ځایونو عمومي رئیس جنرال عبدالعلیم کوهستاني په زندانونو کې د بندیانو د شمیر په اړه وایي"اوس مهال د افغانستان په زندانونو کې ۳۴ زره بندیان پراته دي، چې ۱۲۰۰ یې ښځې دي".
په افغانستان کې د زنداونونو د وضعیت په اړه د بشري حقونو د خپلواک کمیسیون ارزونې ښيي، چې د دغه هیواد په زندانونو کې یوه لویه ستونزه د بندیانو د اوسیدلو لپاره د ځای د نشتون مسله ده.
خو افغان حکومت وايي په دې برخه کې يې یو لړ ګامونه اخیستي دي.
جنرال عبدالعلیم کوهستاني وايي، چې د زندانونو د جوړولو بهیر پیل شوی، چې په ترڅ کې یې تراوسه د تخار، جوزجان او پنجشیر ولایتونو مرکزي زندانونو ودانۍ بشپړې شوي دي.ښاغلي کوهستاني وویل، چې په راروان لمریز کال کې د بلخ، پروان او غزني ولایتونو د زندانونو د ودانیو د جوړولو کار په پام کې نیول شوی دی.