ولسمشر محمد اشرف غني افغان ځواکونه وستایل چې په هلمند کې یې د طالبانو زندان مات کړ او هلته یې لسګونه افغان بندیان خوشي او ازاد کړل.
د جمهوري ریاست د یوې اعلامیې له مخې ولسمشر غني ویلي " دغه عملیات د افغان امنیتي او دفاعي ځوکونه زړورتیا او وړتیا ښيي."
افغان امنیتي مقامات وايي چې د هلمند په ګرشک ولسوالۍ کې يې د وسله والو طالبانو یو زندان مات کړی او لس ګونه زندانیان يې ورڅخه را خوشې کړي دي.
د ۲۱۵ میوند قول اردو قومندان تورن جنرال محمد معین فقیري امریکا غږ اشنا رادیو ته وويل چې د خوشې شویو زندانیانو ټول شمېر ۵۹ کسانو ته رسیږي چې وسله والو طالبانو له تیرو څو میاشتو راهیسې له افغان حکومت سره د همکارۍ او ځینو نورو تورنو له کبله په دغه زندان کې ساتل .
جنرال فقیري وویل چې تیره شپه د ګرشک د نهرسراج ولسوالۍ په ښور سیمه کې ځانګړو افغان ځواکونو د کره استخباراتي معلوماتو پر اساس دغه عملیات ترسره کړل او دا بندیان یې د وسله والو له زندان څخه راخوشې کړل.
دا په هلمند کې د وسله والو طالبانو دوهم ستر زندان دی چې افغان ځواکونو د ځانګړو عملیاتو په ترڅ کې ورڅخه دا بندیان راخوشې کړي دي.
یوه میاشت مخکې هم د هلمند په نوزاد ولسوالۍ کې ځانګړو افغان ځواکونو د عملیاتو په ترځ کې د وسله والو طالبانو له یوه زندان څخه ۶۰ تنه ازاد کړي وو چې سیمه ایز او ملي پوليس، ولسي مشران او څو تنه ماین پاکان هم پکښې شامل وو .
د هلمند د ولایت مطبوعاتي دفتر وايي چې د وسله والو طالبانو له بند څخه په خوشې شویو کسانو کې ممکن حکومتي او حکومت پلوه کسان هم شامل وي ، خو د هغوی زیات يې عام خلک دي چې وسله والو طالبانو په بیلا بیلو تورنو باندې نیولي وو .
سرچینه وايي چې خوشې شوي زندانیانو ته وسله والو طالبانو شکنجې هم ور کړي او دامهال تر درملنې لاندې دي .
ځايي اوسیدونکي وايي چې د هلمند په بیلا بیلو برخو کې وسله وال طالبان پټ او ښکاره زندانونه لري او لس ګونه هغه کسان پکښې ساتل کیږي چې د حقوقي دعو په ګډون ، له حکومت سره د همکارۍ ، د هغوی له امر څخه د سرغړونې او ځینو نورو پېښو کې وسله والو طالبانو ته مطلوب وي .
خپله وسله والو طالبانو پدې اړه رسنیو ته څه ندي ويلي.
جمهور ریس غني په زابل د برمته شوو مسافرو سره وکتل
د افغانستان جمهوري ریاست د رسنیو دفتر وایي چې جمهوررئیس مخمد اشرف غني د جمعې په ماښام د لسو هغو برمته شویو مسافرود حل معلومولو لپاره د ملي امنیت روغتون ته ورغی، چې د افغانستان د ملي امنیت د ریاست د موظفینو او د سیمې د مخورو د هڅو په لړ کې ر یرغمل نیوونکو له منګلو اوړمه ورځ راخوشې شوي دي.
دا مسافر یوه نیمه میاشت وړاندې په زابل ولایت کې یرغمل ککونکو برمته کړي وو.
جمهور رئیس په دې کتنه کې د هغوی روغتیایي حالت وپوښت او هغوی ته د ښه راغلاست پرمهال یې وویل، د خوښۍ او نېکمرغۍ ځای دی چې په سلامتۍ سره خپلو کورنیو ته راستانه شوئ.
