د هلمند امنیتي مقامات وايي چې په نهر سراج والسوالۍ کې د وسله والو طالبانو یو زندان مات شوی او پنځه تنه زندانیان ورڅخه ازداد شوي.
د هلمند د والي ویاند عمر ځواک امریکاغږ اشنا رادیو ته وويل چې عملیات د کره استخباراتي معلوماتو له مخې د ځانګړو افغان ځواکونو له لوري شوي.
نوموړي زیاته کړه چې د وسله والو طالبانو له زندان څخه ازاد شوي پنځه کسان اوس په یوه نظامي روغتون کې تر درملنې لاندي دي او د بشپړه هویت په اړه به يې وروسته معلومات خپاره کړي.
ښاغلي ځواک وویل " عملیات د ګرشک ( نهرسراج) په ولسوالۍ کې شوي پنځه تنه د وسله والو له زندان څخه ازاد شوي او څلور تنه د بندیانو د ساتلو په تړاو نیول شوي دي. ازاد شوي زندانیان په روغتون کې دي خو تر درملنې وروسته به معلومه شي چې هغوی نظامي کسان دي او که ملکي".
بلي خواته د همدې ولسوالۍ په شورکي سیمه کې تیره شپه د افغان او قاطع ماموریت د هوايي بریدونو په ترځ کې ۱۶ تنه د دولت مخالف وسله وال وژل شوي.
په وژل شویو کسانو کې ۴ تنه ځانمرګي برید کونکې هم شامل دي.
د هلمند د والي ویاند عمر ځواک پدې اړه وايي چې د وسله والو طالبانو یوې ډلې غوښتل چې د ځانمرګو بریدونو لپاره څلور تنه بریده کونکې ګرشک ولسوالۍ ته ورسوي چې تر هوايي بریدونو لاندې راغلل.
ښاغلي ځواک وویل " په وژل شویو ۱۶ وسله والو کې ۳ تنه د هغوی سیمه ییز قومندانان دي غوښتل يې په ګرشک ولسوالۍ کې خونړي بریدونه وکړي چې په هوايي برید کې څلور ځانمرګي برید کوونکي هم وژل شوي".
خپله وسله والو طالبانو د هلمند د دغو دواړو امنیتي پېښو په اړه کومه تبصره نده کړې.
