د کندهار د پولسو مقامات وايي چې ځانګړو افغان ځواکونو پدې ولایت کې د اسلامي دولت یا داعش د ډلي د جلب او جذب مسئول نیولی.
د نیول شوي کس بشپړه هویت لاهم پټ ساتل شوی خو چاروکې وايي چې په اړه به يې جزیات وروسته له رسنیو سره شریک شي.
تر اوسه په کندهار کې د داعش ډلي هیڅ ډول فعالیتونه ندي تر سترګو شوي او دا لمړی ځل دی چې په دې ولایت کې د داعش ډلي یو مسئول نیول کیږي.
د کندهار د پوليسو ویاند لمړي څارن ضیا دراني امریکاغږ اشنا رادیو ته وويل چې د"داعش تروریستي ډلي د جلب او جذب دغه مسئول تیره شپه د ښار په لویدیځ اتمه حوزه کې نیول شوی اوس هم له ځانګړو ځواکونو سره تر پلټنو لاندې دی موږ يې په اړه نور جزیات اوس نلرو خو د افغان ځانګړو ځواکونو تر تحقیقاتو بشپړه وړولو وروسته به معلومات له رسنیو سره شریک کړو".
تر دې مخکې د کندهار په ګاونډ د زابل په شمال کې په خاک افغان ،دایچوپان ،ارغنداب او میزانه ولسوالۍ کې د زابل ولایتي شورا او سیمه ییزو اوسیدونکو له تېر یوه کال راهیسې د داعش ډلي د پراخ حضور خبر ورکړی.
ننګرهار کې د داعش پر خلاف عملیات پیل شوي
د ننګرهار ولایتي امنیتي چارواکي وايي چې د حمزه په نوم د افغان ځواکونو دا عملیات د تیرې پنجشنبې په ورځ پیل شوي.
د ننګرهار په ولایت امنیتي چارواکي وايي چې د اچین او هسکې مېنې ولسوالۍ په عملیاتو کې یې څلرویشت داعش جنګیالي وژلي دي.
د ننګرهار د امنیه قوماندانۍ ویاند حضرت حسین مشرقیوال امریکا غږ ته وویل چې د اچین ولسوالۍ په مزده کي سیمه کې د پولیسو ځانګړې قطعې ځمکني عملیات کړي چې له امله یې نهه داعش جنګیالي وژل شوي چې جسدونه یې د جنګ په ساحه کې پاتې دي.
مشرقیوال وايي د همدغې ولسوالۍ په شډل سیمه کې د بهرنیو ځواکونو د بې پيلوټه طیارې په برید کې هم اته داعش وسله وال وژل شوي.
نوموړی زیاتوي چې د هسکې مېنې ولسوالۍ په ګورګورۍ ساحه کې ګډو ځواکونو عملیات کړي چې اوه داعش وسله وال پکې وژل شوي او درې نور زخمیان دي.
د ننګرهار چارواکو ویلي چې دغه ټولې پېښې په تېرو څلرویشتو ساعتونو کې شوي دي.
تر اوسه داعش وسله والو په دې اړه څه نه دي ویلي
