په ارزګان کې چارواکي وايي چې ۹۳ یرغمل شوي ملکيان یې له وسله والو طالبانو څخه ژغورلي دي.
د جمعې په ورځ د ترینکوټ ښار په جنوب اته کيلو مترۍ کې د «باخود» غره په لمن کې سلګونه مېله وال په تفریح بوخت وو چې وسله والو طالبانو پرې برید کړی او ټول يې له ځان سره یرغمل کړي وو.
د ارزګان د والي ویاند زړګی عبادي وايي چې د دغو مېله والو د ژغورلو عملیات ځانګړو ځواکونو وکړل چې د شپې پر لسو بجو پای ته ورسېد او ټول یرغمل شوي یې د طالبانو له بنده ازاد کړل.
تر دا مهاله د یادو کسانو د نیول کېدو انګېزه معلومه نه ده.
نوموړي وويل "په دغو عملیاتو کې درې وسله وال طالبان او یو هم د افغان ځانګړو ځواکونو سرتیری وژل شوی او یو یرغمل شوی ټپي شوی دی چې اوس په روغتون کې دی. نور ټول خپلو کورونو ته رسېدلي."
بلخوا د ارزګان په ګاونډ د دایکندي ولایت د کجران په ولسوالۍ کې د وسله والو طالبانو له یوه زندان څخه لس امنیتي سرتیري په تېښته بریالي شوي او ځانونه يې امنیتي مرکزونو ته رسولي دي.
ښاغلی عبادي وویل چې کجران د دایکندي ولایت مربوط ده او په تښتېدلیو کسانو کې شپږ پوليس، دوه د ملي امنیت او دوه هم د ملي اردو سرتیري شامل دي چې د امنیتي قواوو مرکزونو ته یې ځانونه رسولي.
وسله والو طالبانو تر دا مهاله د دې دواړو پېښو په اړه تبصره نه ده کړې.
